بند قبا کو خوباں جس وقت وا کریں گے

بند قبا کو خوباں جس وقت وا کریں گے

خمیازہ کش جو ہوں گے ملنے کے کیا کریں گے

رونا یہی ہے مجھ کو تیری جفا سے ہر دم

یہ دل دماغ دونوں کب تک وفا کریں گے

ہے دین سر کا دینا گردن پہ اپنی خوباں

جیتے ہیں تو تمہارا یہ قرض ادا کریں گے

درویش ہیں ہم آخر دو اک نگہ کی رخصت

گوشے میں بیٹھے پیارے تم کو دعا کریں گے

آخر تو روزے آئے دو چار روز ہم بھی

ترسا بچوں میں جا کر دارو پیا کریں گے

کچھ تو کہے گا ہم کو خاموش دیکھ کر وہ

اس بات کے لیے اب چپ ہی رہا کریں گے

عالم مرے ہے تجھ پر آئی اگر قیامت

تیری گلی کے ہر سو محشر ہوا کریں گے

دامان دشت سوکھا ابروں کی بے تہی سے

جنگل میں رونے کو اب ہم بھی چلا کریں گے

لائی تری گلی تک آوارگی ہماری

ذلت کی اپنی اب ہم عزت کیا کریں گے

احوال میرؔ کیوں کر آخر ہو ایک شب میں

اک عمر ہم یہ قصہ تم سے کہا کریں گے

band-e-qaba ko khuban jis waqt wa karenge

khamyaza kash jo honge milne ke kya karenge

rona yahi hai mujh ko teri jafa se har dam

ye dil dimagh donon kab tak wafa karenge

hai din sar ka dena gardan pe apni khuban

jite hain to tumhara ye qarz ada karenge

darwesh hain ham akhir do ik nigah ki rukhsat

goshe mein baithe pyare tum ko dua karenge

akhir to roze ae do char roz ham bhi

tarsa bachchon mein ja kar daru piya karenge

kuchh to kahega ham ko khamosh dekh kar wo

is bat ke liye ab chup hi raha karenge

alam mire hai tujh par ai agar qayamat

teri gali ke har su mahshar hua karenge

daman-e-dasht sukha abron ki be tahi se

jangal mein rone ko ab ham bhi chala karenge

lai tiri gali tak awargi hamari

zillat ki apni ab ham izzat kya karenge

ahwal mir kyun kar akhir ho ek shab mein

ik umr ham ye qissa tum se kaha karenge