میں وصل میں بھی شیفتہ حسرت طلب رہا — مصطفیٰ خان شیفتہ (Mustafa Khan Shefta)

میں وصل میں بھی شیفتہ حسرت طلب رہا

گستاخیوں میں بھی مجھے پاسِ ادب رہا

تغییر وضع کی ہے اشارہ وداع کا

یعنی جفا پہ خو گرِ الطاف کب رہا

میں رشک سے چلا تو کہا بے سبب چلا

اس پر جو رہ گیا تو کہا، بے سبب رہا

دم بھر بھی غیر پر نگہِ لطف کیوں ہے اب

اک عمر میں ستم کشِ چشمِ غضب رہا

تھا شب تو آہ میں بھی اثر، جذبِ دل میں بھی

کیوں کر نہ آئے شیفتہ مجھ کو عجب رہا