میں نے اب سمجھا ہے راز کائنات

میں نے اب سمجھا ہے راز کائنات

کر رہا ہوں غم سے تعمیر حیات

کس توقع پر بناؤں آشیاں

زندگی ہے اور برق حادثات

منزل غم اس قدر آساں نہ تھی

رہ گئے منہ دیکھ کر صبر و ثبات

جو محبت سے رہا ناآشنا

ہو کے رہ جاتا ہے ننگ کائنات

چھا رہی ہیں ہر طرف حیرانیاں

عقل ہے بیگانۂ راز حیات

میرے رخ پر تو نہ تھے غم کے نشاں

تم سمجھ لیتے ہو شاید دل کی بات

ہوشؔ کیا کیجے حدیث غم بیاں

کون کہہ سکتا ہے دل کی واردات

main ne ab samjha hai raz-e-kainat

kar raha hun gham se taamir-e-hayat

kis tawaqqo par banaun ashiyan

zindagi hai aur barq-e-hadsat

manzil-e-gham is qadar asan na thi

rah gae munh dekh kar sabr-o-sabat

jo mohabbat se raha naashna

ho ke rah jata hai nang-e-kainat

chha rahi hain har taraf hairaniyan

aql hai begana-e-raz-e-hayat

mere rukh par to na the gham ke nishan

tum samajh lete ho shayad dil ki bat

hosh kya kije hadis-e-gham bayan

kaun kah sakta hai dil ki wardat