میں خودی میں مبتلا خود کو مٹانے کے لیے

میں خودی میں مبتلا خود کو مٹانے کے لیے

تو نے تو ہر ذرے کو ضو دی جگمگانے کے لیے

ایک ادنیٰ سے پتنگے نے بنا دی جان پر

شمع نے کوشش تو کی تھی دل جلانے کے لیے

برق خرمن سوزاب رکھنا ذرا چشم کرم

چار تنکے پھر جڑے ہیں آشیانے کے لیے

منہ نہیں ہر ایک کا جو سختی گردوں سہے

کچھ کلیجہ چاہیے وہ زخم کھانے کے لیے

خوب بلبل کو سکھایا نالۂ مستانہ وار

خوب غنچے کو سمجھ دی مسکرانے کے لیے

اس قدر ارزاں ہوئی ہے آج کل جنس کمال

جھوٹے سکے ڈھل رہے ہیں ہر خزانے کے لیے

خواب میں بھی اب نہیں شاعرؔ وہ گرمی کلام

شمع سی اک رہ گئی ہے جھلملانے کے لیے

main khudi mein mubtala khud ko mitane ke liye

tu ne to har zarre ko zau di jagmagane ke liye

ek adna se patange ne bana di jan par

shama ne koshish to ki thi dil jalane ke liye

barq-e-khirman sozab rakhna zara chashm-e-karam

char tinke phir jure hain ashiyane ke liye

munh nahin har ek ka jo sakhti-e-gardun sahe

kuchh kaleja chahiye wo zakhm khane ke liye

khub bulbul ko sikhaya nala-e-mastana war

khub ghunche ko samajh di muskurane ke liye

is qadar arzan hui hai aj kal jins-e-kamal

jhute sake dhal rahe hain har khazane ke liye

khwab mein bhi ab nahin shayar wo garmi-e-kalam

shama si ik rah gai hai jhilmilane ke liye