میں خوب اہل جہاں دیکھے اور جہاں دیکھا

میں خوب اہل جہاں دیکھے اور جہاں دیکھا

پر آشنا کوئی دیکھا نہ مہرباں دیکھا

ہمیشہ منع تو کرتا تھا باغ سے ہم کو

کچھ حال اب گل و گلشن کا باغباں دیکھا

طلب کمال کی کوئی نہ کیجیو زنہار

کہ میں یہ کر کے فضولی بہت زیاں دیکھا

نہ جانے کون سی ساعت چمن سے بچھڑے تھے

کہ آنکھ بھر کے نہ پھر سوئے گلستاں دیکھا

سنے کو دیکھے پہ ہم کس طرح سے دیں ترجیح

خدا تو ہم نے سنا ہے تمہیں بتاں دیکھا

برنگ غنچہ بہار اس چمن کی سنتے تھے

پہ جوں ہی آنکھ کھلی موسم خزاں دیکھا

نہ کہتے تھے تجھے قائمؔ کہ دل کسی کو نہ دے

مزا کچھ اس کا بھلا تو نے اے میاں دیکھا

main khub ahl-e-jahan dekhe aur jahan dekha

par ashna koi dekha na mehrban dekha

hamesha mana to karta tha bagh se ham ko

kuchh hal ab gul-o-gulshan ka baghban dekha

talab kamal ki koi na kijiyo zinhar

ke main ye kar ke fazuli bahut ziyan dekha

na jane kaun si saat chaman se bichhre the

ke ankh bhar ke na phir su-e-gulsitan dekha

sune ko dekhe pe ham kis tarah se den tarjih

khuda to ham ne suna hai tumhen butan dekha

barang-e-ghuncha bahar is chaman ki sunte the

pe jun hi ankh khuli mausam-e-khizan dekha

na kahte the tujhe qaim ke dil kisi ko na de

maza kuchh us ka bhala tu ne ai miyan dekha