میں سیہ رو اپنے خالق سے جو نعمت مانگتا

میں سیہ رو اپنے خالق سے جو نعمت مانگتا

اپنا منہ دھونے کو پہلے آب خجلت مانگتا

میرے روکھے سوکھے ٹکڑے مجھ کو کر دیتے ہیں سیر

خاک بھر دیتا فلک منہ میں جو نعمت مانگتا

خلق پر ہوتی جو آداب شہادت آشکار

مرغ بسمل بھی تڑپنے کی اجازت مانگتا

رحم ہم آفت‌ رسیدوں پر جو کرتا آسمان

سانس لینے کی ہجوم غم میں مہلت مانگتا

رولتا موتی جو کرتا کشتکاری خیر کی

ہن برستا میں اگر باران رحمت مانگتا

پست بختی نے مجھے محفوظ رکھا شکر ہے

ٹوٹ پڑتا آسماں سر پر جو رفعت مانگتا

قدر میرے گوہر دل کی کچھ اس بت نے نہ کی

بت کدہ لیلام ہوتا میں جو قیمت مانگتا

ایک بوسہ مانگنے پر یار کا رخ پھر گیا

جان میں دیتا اگر وہ بے مروت مانگتا

میں اگر آزادگی میں سرو کو کرتا مرید

تیرا گلدستہ سا قد طوبیٰ سے بیعت مانگتا

دیکھ پاتا کشتگان‌ عشق کا رتبہ اگر

پانی پی پی کر خضر جام شہادت مانگتا

دل میں پڑتے زخم اگر گلزار کی کرتا ہوس

میں لہو روتا اگر باران رحمت مانگتا

کب رہا سیماب جب سیماب چاندی ہو گیا

قلب ماہیت مری ہوتی جو دولت مانگتا

کیا خبر تھی صبح ہو جائے گی تیرے نور سے

شام سے میرا چراغ خانہ رخصت مانگتا

آنکھ جھک جاتی نظر آتا اگر تو خواب میں

تیرے خال رخ سے یوسف داغ حسرت مانگتا

کھائیے کیوں کر نوالے موتیوں کے اے ہوس

طائر دل ہنس کی اے کاش قسمت مانگتا

جوش وحشت لے چلا اتنی نہ مہلت دے مجھے

کوہ و صحرا کے عزیزوں سے تو رخصت مانگتا

دشمنی رکھتا ہے ارباب منش سے آسماں

ہاتھ ملتا عمر بھر دم بھر جو راحت مانگتا

بے دیے ممکن نہیں دنیا میں ہو اجرائے‌ کار

عاملوں سے اسم اعظم بھی ہے دعوت مانگتا

خون عاشق پر کمر باندھے ہوئے ہیں خوبرو

تیغ مصری حلق پر ہوتی جو شربت مانگتا

کیا خبر تھی عاصیوں کی بھی دعا مقبول ہے

بحرؔ دنیا کے بکھیڑے سے فراغت مانگتا

main siyah ru apne khaliq se jo nemat mangta

apna munh dhone ko pahle ab khajlat mangta

mere rukhe sukhe tukre mujh ko kar dete hain sair

khak bhar deta falak munh mein jo nemat mangta

khalq par hoti jo adab-e-shahadat ashkar

murgh-e-bismil bhi tarapne ki ijazat mangta

rahm ham afat rasidon par jo karta asman

sans lene ki hujum-e-gham mein mohlat mangta

rolata moti jo karta kishtkari khair ki

han barasta main agar baran-e-rahmat mangta

past bakhti ne mujhe mahfuz rakha shukr hai

tut parta asman sar par jo rifat mangta

qadr mere gauhar-e-dil ki kuchh us but ne na ki

but kada lilam hota main jo qimat mangta

ek bosa mangne par yar ka rukh phir gaya

jan mein deta agar wo be murawwat mangta

main agar azadagi mein sarw ko karta murid

tera guldasta sa qad tuba se baiat mangta

dekh pata kishtgan-e-ishq ka rutba agar

pani pi pi kar khizar jam-e-shahadat mangta

dil mein parte zakhm agar gulzar ki karta hawas

main lahu rota agar baran-e-rahmat mangta

kab raha simab jab simab chandi ho gaya

qalb-e-mahiyyat miri hoti jo daulat mangta

kya khabar thi subh ho jaegi tere nur se

sham se mera charagh-e-khana rukhsat mangta

ankh jhuk jati nazar ata agar to khwab mein

tere khal-e-rukh se yusuf dagh-e-hasrat mangta

khaiye kyun kar niwale motiyon ke ai hawas

tair-e-dil hans ki ai kash qismat mangta

josh-e-wahshat le chala itni na mohlat de mujhe

koh-o-sahra ke azizon se to rukhsat mangta

dushmani rakhta hai arbab-e-manish se asman

hath milta umr bhar dam bhar jo rahat mangta

be diye mumkin nahin duniya mein ho ijra-e-kar

amilon se ism-e-aazam bhi hai daawat mangta

khun-e-ashiq par kamar bandhe hue hain khubru

tegh-e-misri halq par hoti jo sharbat mangta

kya khabar thi asiyon ki bhi dua maqbul hai

bahr duniya ke bakhere se faraghat mangta