میں نے بٹھلا کے جو پاس اس کو کھلایا بیڑا

میں نے بٹھلا کے جو پاس اس کو کھلایا بیڑا

قتل پر میرے رقیبوں نے اٹھایا بیڑا

مشتعل تا بہ فلک آتش پر دود ہوئی

مل کے جس وقت مسی تم نے چبایا بیڑا

سرخ رو ہو کے یہ کس منہ سے تو اب بولے ہے

میں نے کس روز ترے ہاتھ سے پایا بیڑا

میری اور آپ کی مجلس میں بگڑ جائے گی

تم نے دینے کو کسی کے جو بنایا بیڑا

سبز بختی کہوں کیا اپنی کہ وہ جان گیا

پڑھ کے افسوں میں کھلانے کو جو لایا بیڑا

لال کر دوں گا ابھی بزم میں منہ کتنوں کے

ہاتھ سے تو نے کسی کو جو کھلایا بیڑا

اے نصیرؔ اس کے گلے کا ہوں نہ میں کیوں کر ہار

آج گل رو نے مجھے دیکھ چبایا بیڑا

main ne bithla ke jo pas us ko khilaya bera

qatl par mere raqibon ne uthaya bera

mushtail ta ba falak atish par dud hui

mil ke jis waqt missi tum ne chabaya bera

surkh ru ho ke ye kis munh se to ab bole hai

main ne kis roz tire hath se paya bera

meri aur ap ki majlis mein bigar jaegi

tum ne dene ko kisi ke jo banaya bera

sabz bakhti kahun kya apni ke wo jan gaya

parh ke afsun mein khilane ko jo laya bera

lal kar dunga abhi bazm mein munh kitnon ke

hath se tu ne kisi ko jo khilaya bera

ai nasir us ke gale ka hun na main kyun kar har

aj gul ru ne mujhe dekh chabaya bera