مینار سکوت

وقت کو صحرا کہوں یا بحر بے ساحل کہوں

رات ہے ریگ رواں کی لہر یا کہ موج آب زندگی

تارے جگنو ہیں کہ موتی پھول ہیں یا سیپیاں

کہکشاں ہے دھول تاروں کی کہ موج پر خروش و در فشاں

سوچ کی چنگاریاں اڑتی ہیں یوں

جیسے دل پر چوٹ پڑتی ہو کسی احساس کی

جیسے میں تنہا نہیں

وقت کے صحرا میں جیسے ان گنت سائے ابھر کر میری جانب

دوڑتے آتے ہوں

سائے

بیتی صدیاں جیسے پر پھیلائے اٹھیں گول گول

اپنی لاشیں چھوڑ کر میری طرف آئیں

کہ جیسے نوچ کھائیں گی مجھے

اور پھر مردہ لاشیں یک بیک وحشی بگولوں کی طرح

رقص کرتی چار سو

ڈھول تاشوں اور نقاروں کی ہیبت ناک آوازوں پہ رقص

کھڑکھڑاتی ہڈیاں خود شعلے بن کر ناچتی ہیں چار سو

اور اک زرتشت سجدہ ریز ہو کر

ان کی ہیبت ان کی عظمت ان کی بے رحمی کو کرتا ہو سلام

اور وہ

اس کو اپنی گل فشاں آغوش میں لے کر اٹھیں

جیسے ماں

اپنے بچے کو اٹھائے

اور میں

وقت کے بے رحم ہاتھوں میں ہوں جیسے گدھ کے چنگل میں کوئی زندہ پرند

بیتی صدیاں شب کے سناٹے میں شب خوں مار کر

اس طرح یلغار کرتی ہیں کہ جیسے میں نہتا ہوں

مرے ترکش کے تیر

میرے ہی سینے میں ہیں پیوست

میں زندہ نہیں

زندہ نہیں

دیکھ اے چشم خیال

سار کے تاروں پہ اٹھلاتی ہوئی وہ جوئے نغمہ بوئے گل

وہ عروس آرزو وہ چاندنی کے پیرہن میں حسن رقصاں موج مے

وہ بہاروں کا تبسم وہ جوانی کا غرور

تتلیوں کی خامشی گنگناتی راگنی

آ رہی ہے میری جانب ہاتھ پھیلائے ہوئے

حسن جس کے لوچ سے ہے سنگ مرمر میں گداز

حسن جس کے روپ سے آہن ہوا آئینہ ساز

حسن انگڑائی میں جس کی سیکڑوں قوموں کا راز

حسن جس کے ابروؤں کا جلوہ محراب نماز

حسن جس کا رس بھرا سینہ ہزاروں گنبدوں پر سرفراز

کیا ہوا وہ حسن وہ دوشیزہ وہ میرے

خیالوں کی دلہن

کھو گئی اپنی نمو کے پردۂ رنگیں کے پیچھے کھو گئی

وقت کے صحرا میں ایوانوں کی عظمت سنگ سازوں کی تراش

حجلۂ سیمیں کی رعنائی کا افسوں ہو گئی

حسن پتھر بن گیا فن کی رگوں کا گرم خوں

مردہ صدیوں کے شبستانوں میں اپنی آرزو سے جی اٹھا

اور سورج کی طرح روشن ہوا

دن ڈھلے تک میری آنکھوں میں رہا بیتی ہوئی صدیوں کا نور

میرا سرمایہ تھا سورج کی محبت کا فسوں

میرے ہونٹوں پر ترانے تھے کہ میرے ذہن میں

گیت بن بن کر ابھرتا تھا فضاؤں کا سکوت

یادیں پھولوں کی طرح

دل کے ہر گوشے کو مہکاتی تھیں اور میرے خیال

شام تک

آج کی شب کی تمنا میں رہے

نیم شب کی سرد تاریکی میں یہ ماضی کے بھوت

ناچتے ہیں ہر طرف

جیسے یہ اک اور دنیا سے در آتے ہیں یہاں

جیسے میں ان دشمنوں میں گھر گیا ہوں جن کی بھوک

میرے خوں سے بجھ گئی تو بجھ گئی

خشک ہیں لب دم نکلتا جا ہے دم بدم

بے حسی چھائے چلی جاتی ہے اب میں کیا کروں

کیا کروں

وقت کے صحرا کا اک ذرہ ہوں میں

بیتی صدیوں نے جسے پالا مگر

آج میں ہوں ان کی آنکھوں وہ خار

جس کو اس صحرا پہ کوئی حق نہیں

کاش وقت

وسعت صحرا میں لائے بحر جولاں کا خروش

اور میں اپنے ماضی کی مراد

ٹوٹ کر اک اور ہی صحرا کا ماضی بن سکوں

waqt ko sahra kahun ya bahr-e-be sahil kahun

rat hai reg-e-rawan ki lahr ya ke mauj-e-ab-e-zindagi

tare jugnu hain ke moti phul hain ya sipiyan

kahkashan hai dhul taron ki ke mauj par kharosh-o-dar fishan

soch ki chingariyan urti hain yun

jaise dil par chot parti ho kisi ehsas ki

jaise main tanha nahin

waqt ke sahra mein jaise an ginat sae ubhar kar meri janib

daurte ate hun

sae

biti sadiyan jaise par phailae uthen gol gol

apni lashen chhor kar meri taraf aen

ke jaise noch khaengi mujhe

aur phir murda lashen yak bayak wahshi bagulon ki tarah

raqs karti char su

dhol tashon aur naqqaron ki haibat nak awazon pe raqs

kharkharati haddiyan khud shole ban kar nachti hain char su

aur ik zartasht sajda rez ho kar

un ki haibat un ki azmat un ki be rahmi ko karta ho salam

aur wo

us ko apni gul fishan aghosh mein le kar uthen

jaise man

apne bachche ko uthae

aur main

waqt ke be rahm hathon mein hun jaise gidh ke changul mein koi zinda parind

biti sadiyan shab ke sannate mein shab khun mar kar

is tarah yalghar karti hain ke jaise main nahta hun

mire tarkash ke tir

mere hi sine mein hain paiwast

main zinda nahin

zinda nahin

dekh ai chashm-e-khayal

sar ke taron pe ithlati hui wo ju-e-naghma bu-e-gul

wo urus-e-arzu wo chandni ke pairahan mein husn raqsan mauj-e-mai

wo baharon ka tabassum wo jawani ka ghurur

titliyon ki khamushi gungunati ragni

a rahi hai meri janib hath phailae hue

husn jis ke loch se hai sang-e-marmar mein gudaz

husn jis ke rup se ahan hua aina saz

husn angrai mein jis ki saikron qaumon ka raz

husn jis ke abruon ka jalwa mehrab-e-namaz

husn jis ka ras bhara sina hazaron gumbadon par sarfaraz

kya hua wo husn wo doshiza wo mere

khayalon ki dulhan

kho gai apni numu ke parda-e-rangin ke pichhe kho gai

waqt ke sahra mein aiwanon ki azmat sang sazon ki tarash

hajla-e-simin ki raanai ka afsun ho gai

husn patthar ban gaya fan ki ragon ka garm khun

murda sadiyon ke shabistanon main apni arzu se ji utha

aur suraj ki tarah raushan hua

din dhale tak meri ankhon mein raha biti hui sadiyon ka nur

mera sarmaya tha suraj ki mohabbat ka fusun

mere honton par tarane the ke mere zehn mein

git ban ban kar ubharta tha fazaon ka sukut

yaden phulon ki tarah

dil ke har goshe ko mahkati thin aur mere khayal

sham tak

aj ki shab ki tamanna mein rahe

nim shab ki sard tariki mein ye mazi ke bhut

nachte hain har taraf

jaise ye ik aur duniya se dar ate hain yahan

jaise main in dushmanon mein ghar gaya hun jin ki bhuk

mere khun se bujh gai to bujh gai

khushk hain lab dam nikalta ja hai dam badam

be hissi chhae chali jati hai ab main kya karun

kya karun

waqt ke sahra ka ik zarra hun main

biti sadiyon ne jise pala magar

aj main hun un ki ankhon wo khar

jis ko is sahra pe koi haq nahin

kash waqt

wusat-e-sahra mein lae bahr jaulan ka kharosh

aur main apne mazi ki murad

tut kar ik aur hi sahra ka mazi ban sakun