میرے ہمراہ مرے گھر پہ بھی آفت آئی — بیخود دہلوی (Bekhud Dehlvi)

میرے ہمراہ مرے گھر پہ بھی آفت آئی

آسماں ٹوٹ پڑا برق گری چھت آئی

شرم آئی بھی جو اس شوخ کی آنکھوں میں کبھی

شوخیاں کرتی ہوئی ساتھ شرارت آئی

ہجر میں جان ہے دوبھر یہ لکھا تھا ان کو

خط میں لکھی ہوئی مرنے کی اجازت آئی

سوچتا جاتا ہوں رستے میں کہ یہ دوں گا جواب

گفتگو ان سے اگر غیر کی بابت آئی

پھر ہر اک شعر میں کچھ درد کا پاتا ہوں اثر

پھر کہیں حضرت بیخودؔ کی طبیعت آئی