میں برا ہی سہی بھلا نہ سہی — عیش دہلوی

Arooz is now on the App Store, for iPhone and iPad. Download →

عیش دہلوی

میں برا ہی سہی بھلا نہ سہی

پر تری کون سی جفا نہ سہی

درد دل ہم تو ان سے کہہ گزرے

گر انہوں نے نہیں سنا نہ سہی

شب غم میں بلا سے شغل تو ہے

نالۂ دل مرا رسا نہ سہی

دل بھی اپنا نہیں رہا نہ رہے

یہ بھی اے چرخ فتنہ زا نہ سہی

دیکھ تو لیں گے وہ اگر آئے

طاقت عرض مدعا نہ سہی

کچھ تو عاشق سے چھیڑ چھاڑ رہی

کج ادائی سہی ادا نہ سہی

کیوں برا مانتے ہو شکوہ مرا

چلو بے جا سہی بجا نہ سہی

عقدۂ دل ہمارا یا قسمت

نہ کھلا تجھ سے اے صبا نہ سہی

واعظو بندۂ خدا تو ہے عیشؔ

ہم نے مانا وہ پارسا نہ سہی