میرے گل کا جو کوئی لطف و کرم دیکھا ہے — عشق اورنگ آبادی

Arooz is now on the App Store, for iPhone and iPad. Download →

عشق اورنگ آبادی

میرے گل کا جو کوئی لطف و کرم دیکھا ہے

حسن اور خلق کے تئیں اس نے بہم دیکھا ہے

تیرے ابرو کے مقابل تو ہلال آسا ہے

ہر کماں ابرو کی قامت کو بھی خم دیکھا ہے

چشم الطاف سے اس مست نین کی ہے کماں

کہ کسی وقت مرے دیدۂ نم دیکھا ہے

کہتے ہیں دار محن ہے یہ جہان فانی

کون وہ شخص ہے جن نے کہ نہ غم دیکھا ہے

اشک اور آہ سے ہے عشقؔ کا روشن اعجاز

آب و آتش کو کسو نے بھی بہم دیکھا ہے