میرے گلے سے آن کے پیارا جو پھر لگے

میرے گلے سے آن کے پیارا جو پھر لگے

یہ ابر یہ بہار مجھے خوب تر لگے

بن دیکھے اس پیارے کے آنکھوں نے اپنا حال

ایسا کیا ہے جیسے کہ باراں کا جھڑ لگے

مت اس ادا و ناز سے گلشن میں کر گزر

ڈرتا ہوں میں مبادا کسی کی نظر لگے

ہو چار چشم کون سکے ایسے یار سے

آنکھوں کے دیکھتے ہی پیا کی خطر لگے

ہر لیل و ہر نہار تری ذات پاک سے

کہتا ہے آفتابؔ دعائے سحر لگے

mere gale se an ke pyara jo phir lage

ye abr ye bahar mujhe khub tar lage

bin dekhe is pyare ke ankhon ne apna hal

aisa kya hai jaise ke baran ka jhar lage

mat is ada-o-naz se gulshan mein kar guzar

darta hun main mabada kisi ki nazar lage

ho char chashm kaun sake aise yar se

ankhon ke dekhte hi piya ki khatar lage

har lail-o-har nahar tiri zat-e-pak se

kahta hai aftab dua-e-sahar lage