میڈیکل ٹیسٹ

دو ملازم ایک کالا اور گورا دوسرا

دوسرا پیدل مگر پہلا سوار راہ وار

تھے سول سرجن کی کوٹھی کی طرف دونوں رواں

کیونکہ بیماری کی رخصت کے تھے دونوں خواست گار

راہ میں دونوں کے باہم ہو گئی کچھ ہشت مشت

کوکھ میں کالے کی اک مکا دیا گورے نے مار

صدمہ پہنچا جس سے تلی کو بہت مسکین کی

آ کے گھوڑے سے لیا سائیس نے اس کو اتار

ٹھوک کر کالے کو گورے نے تو اپنی راہ لی

چوٹ کے صدمے سے غش کالے کو آیا چند بار

آخرش کوٹھی پہ پہنچے جا کے دونوں پیش و پس

ضارب اپنے پاؤں اور مضروب ڈولی میں سوار

ڈاکٹر نے آ کے دونوں کی سنی جب سرگزشت

تہ کو جا پہنچا سخن کی سن کے قصہ ایک بار

دی سند گورے کو لکھ کر جس میں تھی تصدیق مرض

اور یہ لکھا تھا مسائل ہیں بہت زار و نزار

یعنی اک کالا نہ جس گورے کے مکے سے مرے

کر نہیں سکتا حکومت ہند پر وہ زینہار

اور کہا کالے سے تم کو مل نہیں سکتی سند

کیونکہ تم معلوم ہوتے ہو بظاہر جان دار

ایک کالا پٹ کے جو گورے سے فوراً مر نہ جائے

آئے بابا اس کی بیماری کا کیونکر اعتبار

do mulazim ek kala aur gora dusra

dusra paidal magar pahla sawar-e-rah war

the siwil sarjan ki kothi ki taraf donon rawan

kyunke bimari ki rukhsat ke the donon khwast gar

rah mein donon ke baham ho gai kuchh hasht musht

kokh mein kale ki ik maka diya gore ne mar

sadma pahuncha jis se tilli ko bahut miskin ki

a ke ghore se liya sais ne us ko utar

thok kar kale ko gore ne to apni rah li

chot ke sadme se ghash kale ko aya chand bar

akhirash kothi pe pahunche ja ke donon pesh-o-pas

zarib apne paon aur mazriob doli mein sawar

daktar ne a ke donon ki suni jab sarguzasht

tah ko ja pahuncha sukhan ki sun ke qissa ek bar

di sanad gore ko likh kar jis mein thi tasdiq marz

aur ye likha tha masail hain bahut zar-o-nizar

yaani ik kala na jis gore ke make se mire

kar nahin sakta hukumat hind par wo zinhar

aur kaha kale se tum ko mil nahin sakti sanad

kyunke tum maalum hote ho bazahir jan dar

ek kala pat ke jo gore se fauran mar na jae

ae baba us ki bimari ka kyunkar etibar