میرے رونے پر کسی کی چشم گریاں ہائے ہائے

میرے رونے پر کسی کی چشم گریاں ہائے ہائے

وہ گل تر وہ فضائے شبنمستاں ہائے ہائے

وہ کسی کی یاد پیہم شام ہجراں ہائے ہائے

ہر نفس وقف نوا ہائے پریشاں ہائے ہائے

دل پہ درد عشق کا ایک ایک احساں ہائے ہائے

جان کی صورت میں کوئی دشمن جاں ہائے ہائے

صبح ہجراں بد تر از شبہائے ہجراں ہائے ہائے

زندگی اک مستقل خواب پریشاں ہائے ہائے

دل کی راحت کے لئے ان کی محبت کے لئے

کوشش بے سود پھرتا حد امکاں ہائے ہائے

میری خاطر اور وہ مجبوریوں کا اعتراف

ان کے نازک دل کو بھی احساس ہجراں ہائے ہائے

کیفیات سجدۂ ذوق محبت الاماں

کعبۂ دل بے نیاز کفر و ایماں ہائے ہائے

وہ مرا کیف نظر وہ بے خودی وہ سر خوشی

فرصت نظارہ ہائے حسن جاناں ہائے ہائے

ان کی محفل میں بھی ہوں دامن کش وحشت بہ دل

ہر جگہ اک عالم آداب زنداں ہائے ہائے

یاس کی موجوں میں ہر منظر کا آخر ڈوبنا

دل سے وہ اٹھتا ہوا طوفان حرماں ہائے ہائے

جو نہ سمجھیں درد کیا ہے درد کا احساس کیا

کب تک ان کے واسطے باسطؔ غزل خواں ہائے ہائے

mere rone par kisi ki chashm-e-giryan hae hae

wo gul-e-tar wo faza-e-shabnamsitan hae hae

wo kisi ki yad paiham sham-e-hijran hae hae

har nafas waqf-e-nawa ha-e-pareshan hae hae

dil pe dard-e-ishq ka ek ek ehsan hae hae

jan ki surat mein koi dushman-e-jan hae hae

subh-e-hijran bad tar az shabhae hijran hae hae

zindagi ik mustaqil khwab-e-pareshan hae hae

dil ki rahat ke liye un ki mohabbat ke liye

koshish-e-be sud phirta had-e-imkan hae hae

meri khatir aur wo majburiyon ka etiraf

un ke nazuk dil ko bhi ehsas-e-hijran hae hae

kaifiyat-e-sajda-e-zauq-e-mohabbat alaman

kaaba-e-dil be niyaz-e-kufr-o-iman hae hae

wo mira kaif-e-nazar wo be khudi wo sar khushi

fursat-e-nazzara ha-e-husn janan hae hae

un ki mahfil mein bhi hun daman kash wahshat ba dil

har jagah ik alam-e-adab-e-zindan hae hae

yas ki maujon mein har manzar ka akhir dubna

dil se wo uthta hua tufan-e-hirman hae hae

jo na samjhen dard kya hai dard ka ehsas kya

kab tak un ke waste basit ghazal khwan hae hae