میرے جانب سے اسے جا جا کے سمجھاتے ہیں لوگ

میرے جانب سے اسے جا جا کے سمجھاتے ہیں لوگ

وہ نہیں سننے کا ضد بیکار دلواتے ہیں لوگ

شعلہ خو میرا سنے مجھ دل جلے کا حال کیوں

آگ میں آگ اور بھی ناحق لگا آتے ہیں لوگ

میرے مرنے پر انہیں کیوں رشک سے پوچھو کوئی

کیوں سر بالیں مرے بیکار چلاتے ہیں لوگ

کوئی کہتا ہے تجھے جلاد کوئی سنگ دل

تیری جانب سے مجھے آ آ کے دھمکاتے ہیں لوگ

میں نہ جیتا ہوں نہ مرتا ہوں سسکتا ہوں پڑا

جھوٹ سچ قسمیں تمہارے سامنے کھاتے ہیں لوگ

دوستی کے پردے میں کرتے ہیں مجھ سے دشمنی

تم کو پھر اگلی جفائیں یاد دلواتے ہیں لوگ

تیری محفل میں مرا آنا جو ان کو بار ہے

چھیڑ کر تجھ کو مجھے باتیں ہی سنواتے ہیں لوگ

تم سے اور وعدہ وفا ہو یہ ہمیں باور نہیں

قسمیں دے کر تم کو ناحق جھوٹ بلواتے ہیں لوگ

باز آیا آسماں ان کی ہوا خواہی سے میں

آگ دل کی اور بھی آ آ کے بھڑکاتے ہیں لوگ

mere janib se use ja ja ke samjhate hain log

wo nahin sunne ka zid bekar dalwate hain log

shola khu mera sune mujh dil jale ka hal kyun

ag mein ag aur bhi nahaq laga ate hain log

mere marne par unhen kyun rashk se puchho koi

kyun sar-e-balin mire bekar chillate hain log

koi kahta hai tujhe jallad koi sang dil

teri janib se mujhe a a ke dhamkate hain log

main na jita hun na marta hun sisakta hun para

jhut sach qasmen tumhare samne khate hain log

dosti ke parde mein karte hain mujh se dushmani

tum ko phir agli jafaen yad dalwate hain log

teri mahfil mein mira ana jo un ko bar hai

chher kar tujh ko mujhe baten hi sunwate hain log

tum se aur waada wafa ho ye hamen bawar nahin

qasmen de kar tum ko nahaq jhut biloite hain log

baz aya asman un ki hawa khwahi se main

ag dil ki aur bhi a a ke bhirkate hain log