میرے احوال کا افسانہ بنایا ہوتا

میرے احوال کا افسانہ بنایا ہوتا

ہر پری زاد کو دیوانہ بنایا ہوتا

تو جو روشن مرا کاشانہ بنایا ہوتا

منہ ہر اک شمع سے پروانہ بنایا ہوتا

ہار تو اس کے گلے کے نہ بنے اشک مرے

دل کو بالے ہی کا دردانہ بنایا ہوتا

دیکھی مسجد کی بنا میں نے یہ دل میں سوچا

کاش اس جا کوئی مے خانہ بنایا ہوتا

دیکھتے شوق سے چھاتی کو لگا بھی لیتے

دل کو جو آئینہ خانہ نہ بنایا ہوتا

حسرت بوسۂ لب کس لئے جاناں رہتی

خاک سے میرے جو پیمانہ بنایا ہوتا

سر کو بازو پہ مرے آپ جو رکھ کر سوتے

زلف کا پلکوں ہی سے شانہ بنایا ہوتا

چمن کوچۂ جاناں میں جو ہوتا میں نسیمؔ

غیر کو سبزۂ بیگانہ بنایا ہوتا

mere ahwal ka afsana banaya hota

har pari zad ko diwana banaya hota

tu jo raushan mira kashana banaya hota

munh har ik shama se parwana banaya hota

har to us ke gale ke na bane ashk mire

dil ko bale hi ka dardana banaya hota

dekhi masjid ki bana main ne ye dil mein socha

kash is ja koi mai khana banaya hota

dekhte shauq se chhati ko laga bhi lete

dil ko jo aina khana na banaya hota

hasrat-e-bosa-e-lab kis liye janan rahti

khak se mere jo paimana banaya hota

sar ko bazu pe mire ap jo rakh kar sote

zulf ka palkon hi se shana banaya hota

chaman-e-kucha-e-janan mein jo hota main nasim

ghair ko sabza-e-begana banaya hota