میرا شکوہ تری محفل میں عدو کرتے ہیں

میرا شکوہ تری محفل میں عدو کرتے ہیں

اس پہ بھی صبر ہم اے عربدہ جو کرتے ہیں

مشق بیداد و ستم کرتے ہیں گر وہ تو یہاں

ہم بھی بیداد و ستم سہنے کی خو کرتے ہیں

جاں ہوئی ہے نگہ نام پہ ان کی عاشق

چاک دل تار نظر سے جو رفو کرتے ہیں

بے ثباتی چمن دہر کی ہے جن پہ کھلی

ہوس رنگ نہ وہ خواہش بو کرتے ہیں

آج شمشیر بکف نکلے ہیں وہ دیکھیے تر

آب شمشیر سے کس کس کے گلو کرتے ہیں

ہے رچی جن کے دماغوں میں تری زلف کی بو

عنبر و مشک کی کب بو کو وہ بو کرتے ہیں

مشک و عنبر کا انہیں نام بھی لینا ہے ننگ

یار کی زلف معنبر کو جو بو کرتے ہیں

چاک کرتے ہیں گریباں کو وحشت میں کبھی

چاک دل میں کبھو ناخن کو فرو کرتے ہیں

دیکھ سودا زدۂ الفت خوباں اے عیشؔ

وادی عشق میں کیا کیا تگ و پو کرتے ہیں

mera shikwa tiri mahfil mein adu karte hain

us pe bhi sabr ham ai arbada jo karte hain

mashq-e-bedad-o-sitam karte hain gar wo to yahan

ham bhi bedad-o-sitam sahne ki khu karte hain

jan hui hai nigah-e-nam pe un ki ashiq

chak-e-dil tar-e-nazar se jo rafu karte hain

be sabati-e-chaman dahr ki hai jin pe khuli

hawas rang na wo khwahish bu karte hain

aj shamshir bakaf nikle hain wo dekhiye tar

ab-e-shamshir se kis kis ke galo karte hain

hai rachi jin ke dimaghon mein tiri zulf ki bu

ambar-o-mushk ki kab bu ko wo bu karte hain

mushk-o-ambar ka unhen nam bhi lena hai nang

yar ki zulf-e-muambar ko jo bu karte hain

chak karte hain gareban ko wahshat mein kabhi

chak-e-dil mein kabhu nakhun ko faro karte hain

dekh sauda zada-e-ulfat-e-khuban ai aish

wadi-e-ishq mein kya kya tag-o-pau karte hain