میری اس پیاری جھب سے آنکھ لگی

میری اس پیاری جھب سے آنکھ لگی

اس سراپا عجب سے آنکھ لگی

عشق میں خواب کا خیال کسے

نہ لگی آنکھ جب سے آنکھ لگی

خواب میں بھی نہ دیکھا ہم نے لطف

کس سراپا غضب سے آنکھ لگی

جتنے خوش چشم ہیں زمانے میں

رہتی ہے میری سب سے آنکھ لگی

رات ہمسایوں کی نہ صبح تلک

میری افغان شب سے آنکھ لگی

یار آتا نظر نہیں آتا

ہے ادھر میری کب سے آنکھ لگی

رہتی ہے اس نگاہ کافر کی

رنجش بے سبب سے آنکھ لگی

مجھ کو مت دیکھ ہے بلا حسرتؔ

یار عاشق طلب سے آنکھ لگی

meri is pyari jhab se ankh lagi

is sarapa ajab se ankh lagi

ishq mein khwab ka khayal kise

na lagi ankh jab se ankh lagi

khwab mein bhi na dekha ham ne lutf

kis sarapa ghazab se ankh lagi

jitne khush chashm hain zamane mein

rahti hai meri sab se ankh lagi

rat hamsayon ki na subh talak

meri afghan shab se ankh lagi

yar ata nazar nahin ata

hai idhar meri kab se ankh lagi

rahti hai us nigah kafir ki

ranjish-e-be sabab se ankh lagi

mujh ko mat dekh hai bala hasrat

yar ashiq talab se ankh lagi