میرے آگے تذکرہ معشوق و عاشق کا برا

میرے آگے تذکرہ معشوق و عاشق کا برا

اگلی باتیں مجھ کو یاد آتی ہیں یہ چرچا برا

ناگہانی تھی جو میں عاشق ہوا رسوا ہوا

چاہتا ہے کوئی دنیا میں بھلا اپنا برا

ہے یہی صورت تو ہم سے راز پوشی ہو چکی

چشم تر لب خشک چہرہ زرد یہ نقشہ برا

ہم غریبوں سے نہ پوچھو نعمت دنیا کا حال

شکر کر کے کھا لیا جو کچھ ملا اچھا برا

ایک بوسے پر بھی میرا دل نہ صاحب نے لیا

اتنی قیمت پر تو اچھا تھا نہ اتنا تھا برا

کر گزریے میرے حق میں آپ جو منظور ہو

آئے دن کا معرکہ ہر روز کا جھگڑا برا

آدمی ہوتا ہے سرگرداں بگولے کی طرح

آندھیاں اچھی ہوا و حرص کا جھونکا برا

آئے جب وعدے کے شب مہندی لگا بیٹھا وہ شوخ

دوسری رات استخارہ آنے کو آیا برا

بن کے اڑ ناگن موذن کو ڈسے زلف صنم

وصل کی شب کو اذان صبح کا کھٹکا برا

آنکھ سے دیکھو گی وہ کچھ آبرو کو رؤو گی

جھانک تاک اچھی نہیں اے بحرؔ یہ لپکا برا

mere age tazkira maashuq-o-ashiq ka bura

agli baten mujh ko yad ati hain ye charcha bura

nagahani thi jo main ashiq hua ruswa hua

chahta hai koi duniya mein bhala apna bura

hai yahi surat to ham se raz poshi ho chuki

chashm-e-tar lab khushk chehra zard ye naqsha bura

ham gharibon se na puchho nemat duniya ka hal

shukr kar ke kha liya jo kuchh mila achchha bura

ek bose par bhi mera dil na sahab ne liya

itni qimat par to achchha tha na itna tha bura

kar guzariye mere haq mein ap jo manzur ho

ae din ka marka har roz ka jhagra bura

admi hota hai sargardan bagule ki tarah

andhiyan achchhi hua-o-hirs ka jhonka bura

ae jab waade ke shab mehndi laga baitha wo shokh

dusri rat istikhara ane ko aya bura

ban ke ur nagin muazzin ko dase zulf-e-sanam

wasl ki shab ko azan-e-subh ka khatka bura

ankh se dekhogi wo kuchh abru ko roo gi

jhank tak achchhi nahin ai bahr ye lapka bura