میری وحشت کا جو افسانہ بنایا ہوتا

میری وحشت کا جو افسانہ بنایا ہوتا

سننے والوں کو بھی دیوانہ بنایا ہوتا

ان کے لانے کی نہ سوجھی تجھے قاصد تدبیر

جھوٹ سچ کوئی تو افسانہ بنایا ہوتا

دیکھتے تم کہ سنور جاتے نہ گیسو کیسے

میری پلکوں کا اگر شانہ بنایا ہوتا

مر کے بھی روح نہ پینے کو ترستی ساقی

میری مٹی سے جو پیمانہ بنایا ہوتا

تم نے زلفوں کو بنا کر ہمیں دیوانہ کیا

کیا بگڑتا تھا تمہارا نہ بنایا ہوتا

دل جو واعظ کا بنایا تھا الٰہی پتھر

کاش سنگ در مے خانہ بنایا ہوتا

دل وحشی جو چھٹا مجھ سے بہت خوب ہوا

ورنہ اب تک مجھے دیوانہ بنایا ہوتا

وسعت دل جو کوئی پیر مغاں دکھلایا

ایک اک جام کو مے خانہ بنایا ہوتا

منہ سے آنچل جو ہٹاتا وہ سر بزم جلیلؔ

بہ خدا شمع کو پروانہ بنایا ہوتا

meri wahshat ka jo afsana banaya hota

sunne walon ko bhi diwana banaya hota

un ke lane ki na sujhi tujhe qasid tadbir

jhut sach koi to afsana banaya hota

dekhte tum ke sanwar jate na gesu kaise

meri palkon ka agar shana banaya hota

mar ke bhi ruh na pine ko tarasti saqi

meri mitti se jo paimana banaya hota

tum ne zulfon ko bana kar hamen diwana kiya

kya bigarta tha tumhara na banaya hota

dil jo waiz ka banaya tha ilahi patthar

kash sang-e-dar-e-mai khana banaya hota

dil-e-wahshi jo chhuta mujh se bahut khub hua

warna ab tak mujhe diwana banaya hota

wusat-e-dil jo koi pir-e-mughan dikhlaya

ek ik jam ko mai khana banaya hota

munh se anchal jo hatata wo sar-e-bazm jalil

ba khuda shama ko parwana banaya hota