مری ہر سانس کو سب نغمۂ محفل سمجھتے ہیں

مری ہر سانس کو سب نغمۂ محفل سمجھتے ہیں

مگر اہل دل آواز شکست دل سمجھتے ہیں

گماں کاشانۂ رنگیں کا ہے جس پر نگاہوں کو

اسے اہل نظر گرد رہ منزل سمجھتے ہیں

الٰہی کشتئ دل بہہ رہی ہے کس سمندر میں

نکل آتی ہیں موجیں ہم جسے ساحل سمجھتے ہیں

طرب انگیز ہیں رنگینیاں فصل بہاری کی

مگر بلبل انہیں خون رگ بسمل سمجھتے ہیں

پگھل کر دل لہو ہو ہو کے بہہ جاتا ہے آنکھوں سے

ستم ہے شمع کو جو زینت محفل سمجھتے ہیں

کہاں ہوگا ٹھکانا برق رفتاری ان کی وحشت کا

کہ وہ منزل کو بھی سنگ رہ منزل سمجھتے ہیں

بگولے اڑ رہے ہیں جو ہمارے دشت وحشت میں

انہیں کو اے اثرؔ ہم پردۂ محمل سمجھتے ہیں

miri har sans ko sab naghma-e-mahfil samajhte hain

magar ahl-e-dil awaz-e-shikast-e-dil samajhte hain

guman kashana-e-rangin ka hai jis par nigahon ko

use ahl-e-nazar gard-e-rah-e-manzil samajhte hain

ilahi kashti-e-dil bah rahi hai kis samundar mein

nikal ati hain maujen ham jise sahil samajhte hain

tarab angez hain ranginiyan fasl-e-bahari ki

magar bulbul unhen khun-e-rag-e-bismil samajhte hain

pighal kar dil lahu ho ho ke bah jata hai ankhon se

sitam hai shama ko jo zinat-e-mahfil samajhte hain

kahan hoga thikana barq raftari un ki wahshat ka

ke wo manzil ko bhi sang-e-rah-e-manzil samajhte hain

bagule ur rahe hain jo hamare dasht-e-wahshat mein

unhen ko ai asar ham parda-e-mahmil samajhte hain