مری پتھر آنکھیں

اب کے مٹی کی عبارت میں لکھی جائے گی

سبز پتوں کی کہانی رخ شاداب کی بات

کل کے دریاؤں کی مٹتی ہوئی مبہم تحریر

اب فقط ریت کے دامن میں نظر آئے گی

بوند بھر نم کو ترس جائے گی بے سود دعا

نم اگر ہوگی کوئی چیز تو میری آنکھیں

میرا اجڑا ہوا چہرہ مری پتھر آنکھیں

قحط افسانہ نہیں اور یہ بے ابر فلک

آج اس دیس کل اس دیس کا وارث ہوگا

ہم سے ترکے میں ملیں گے اسے بیمار درخت

تیز کرنوں کی تمازت سے چٹختے ہوئے ہونٹ

دھوپ کا حرف جنوں لو کا وصیت نامہ

اور مرے شہر طلسمات کی بے در آنکھیں

مری بے در مری بنجر مری پتھر آنکھیں

ab ke mitti ki ibarat mein likhi jaegi

sabz patton ki kahani rukh-e-shadab ki bat

kal ke dariyaon ki mitti hui mubham tahrir

ab faqat ret ke daman mein nazar aegi

bund bhar nam ko taras jaegi be sud dua

nam agar hogi koi chiz to meri ankhen

mera ujra hua chehra miri patthar ankhen

qaht afsana nahin aur ye be abr falak

aj is des kal is des ka waris hoga

ham se tarke mein milenge use bimar darakht

tez kirnon ki tamazat se chatakhte hue hont

dhup ka harf-e-junun lo ka wasyyat nama

aur mire shahr tilismat ki be dar ankhen

miri be dar miri banjar miri patthar ankhen