مری شاکی ہے خود میری فغاں تک

مری شاکی ہے خود میری فغاں تک

کہ تالو سے نہیں لگتی زباں تک

کوئی حسرت ہی لے آئے منا کر

مرے روٹھے ہوئے دل کو یہاں تک

جگہ کیا درد کی بھی چھین لے گا

جگر کا داغ پھیلے گا کہاں تک

اثر نالوں میں جو تھا وہ بھی کھویا

بہت پچھتائے جا کر آسماں تک

فلک تیرے جگر کے داغ ہیں ہم

مٹائے جا مٹانا ہے جہاں تک

وہ کیا پہلو میں بیٹھے اٹھ گئے کیا

نہ لیں جلدی میں دو اک چٹکیاں تک

کوئی مانگے تو آ کر منتظر ہے

لیے تھوڑی سی جان اک نیم جاں تک

اٹھانے سے اجل کے میں نہ اٹھتا

وہ آتے تو کبھی مجھ ناتواں تک

جلالؔ نالہ کش چپکا نہ ہوگا

وہ دے کر دیکھ لیں منہ میں زباں تک

miri shaki hai khud meri fughan tak

ke talu se nahin lagti zaban tak

koi hasrat hi le ae mana kar

mire ruthe hue dil ko yahan tak

jagah kya dard ki bhi chhin lega

jigar ka dagh phailega kahan tak

asar nalon mein jo tha wo bhi khoya

bahut pachhtae ja kar asman tak

falak tere jigar ke dagh hain ham

mitae ja mitana hai jahan tak

wo kya pahlu mein baithe uth gae kya

na len jaldi mein do ik chutkiyan tak

koi mange to a kar muntazir hai

liye thori si jan ik nim jan tak

uthane se ajal ke main na uthta

wo ate to kabhi mujh natawan tak

jalal-e-nala kash chipka na hoga

wo de kar dekh len munh mein zaban tak