ممکن نہیں دوا ہے اس آزار کے لیے
جمیلہ خدا بخشممکن نہیں دوا ہے اس آزار کے لیے
بہتر ہے موت عاشق بیمار کے لیے
مر کر ہوا ہوں خاک در یار کے لیے
سایہ بنا ہوں میں تری دیوار کے لیے
دام بلائے ہستیٔ موہوم میں پھنسا
بہتر یہی سزا تھی گناہ گار کے لیے
کیوں کر رقیب آئیں نہ محفل میں آپ کی
ہے خار گل کے واسطے گل خار کے لیے
پا بوسیوں کے شوق میں اپنا یہ لوح دل
اک خال بن گیا قدم یار کے لیے
جلوہ دکھا دے خواب میں بہر خدا مجھے
آنکھیں ترس گئیں ترے دیدار کے لیے
بچوں کی طرح ہم نے اس آغوش ناز میں
پالا تھا دل کو تجھ سے دل آزار کے لیے
اب شیخ و برہمن مرے دامن کے تار کو
آتے ہیں لینے سبحہ و زنار کے لیے
مونس جو ایک دل تھا وہ گھل کر فراق سے
آنسو بنا ہے چشم گہر بار کے لیے
اس رخ کو دیکھتے ہی دل زار نے کہا
زیبا ہے غازہ ایسا ہی رخسار کے لیے
کیا حال دل سناؤں جمیلہؔ کہ ضعف سے
قوت زباں میں چاہیے اظہار کے لیے
mumkin nahin dawa hai is azar ke liye
behtar hai maut ashiq-e-bimar ke liye
mar kar hua hun khak-e-dar-e-yar ke liye
saya bana hun main tiri diwar ke liye
dam-e-bulae hasti-e-mauhum mein phansa
behtar yahi saza thi gunah gar ke liye
kyun kar raqib aen na mahfil mein ap ki
hai khar-e-gul ke waste gul khar ke liye
pa bosiyon ke shauq mein apna ye lauh-e-dil
ik khal ban gaya qadam yar ke liye
jalwa dikha de khwab mein bahr-e-khuda mujhe
ankhen taras gain tire didar ke liye
bachchon ki tarah ham ne is aghosh-e-naz mein
pala tha dil ko tujh se dil azar ke liye
ab shaikh-o-barahman mire daman ke tar ko
ate hain lene subha-o-zunnar ke liye
munis jo ek dil tha wo ghul kar firaq se
ansu bana hai chashm-e-guhar bar ke liye
us rukh ko dekhte hi dil-e-zar ne kaha
zeba hai ghaza aisa hi rukhsar ke liye
kya hal-e-dil sunaun jamilahu ke zof se
quwwat zaban mein chahiye izhar ke liye