ملتے ہیں ہاتھ، ہاتھ لگیں گے انار کب

ملتے ہیں ہاتھ، ہاتھ لگیں گے انار کب

جوبن کا ان کے دیکھیے ہوگا ابھار کب

عشاق منتظر ہیں قیامت کب آئے گی

بے پردہ منہ دکھائے گا وہ پردہ دار کب

اک روز اپنی جان پہ ہم کھیل جائیں گے

تم پوچھتے رہوگے یوں ہی بار بار کب

بیکس کو کون روئے غریبوں کا کون ہے

میری لحد پہ شمع ہوئی اشک بار کب

کون آیا پڑھتے فاتحہ کس نے چڑھائے پھول

مرنے کے بعد پوچھتا ہے کوئی یار کب

امید ناامید کو ان سے نہیں رہی

دشمن کے دوست ہیں وہ ہوئے میرے یار کب

جو اونچے اونچے ہیں وہی جاتے ہیں بام پر

محفل میں ہم غریبوں کو ملتا ہے یار کب

جب نقد مال تو نے دیا ہم نے نقد دل

ساقی ہمیں بتا دے کہ پی تھی ادھار کب

ملنا چھڑایا تم سے مرا رشک غیر نے

کرتا ہے کوئی آپ سے جبر اختیار کب

آغاؔ کو ذبح کرتے ہو اپنی گلی میں کیوں

جائز ہے میری جان حرم میں شکار کب

milte hain hath, hath lagenge anar kab

joban ka un ke dekhiye hoga ubhar kab

ushshaq muntazir hain qayamat kab aegi

be parda munh dikhaega wo parda dar kab

ik roz apni jan pe ham khel jaenge

tum puchhte rahoge yun hi bar bar kab

bekas ko kaun roe gharibon ka kaun hai

meri lahad pe shama hui ashk bar kab

kaun aya parhte fatiha kis ne charhae phul

marne ke baad puchhta hai koi yar kab

ummid naummid ko un se nahin rahi

dushman ke dost hain wo hue mere yar kab

jo unche unche hain wahi jate hain bam par

mahfil mein ham gharibon ko milta hai yar kab

jab naqd mal tu ne diya ham ne naqd-e-dil

saqi hamen bata de ke pi thi udhar kab

milna chhuraya tum se mira rashk-e-ghair ne

karta hai koi ap se jabr ikhtiyar kab

agha ko zabh karte ho apni gali mein kyun

jaiz hai meri jan-e-haram mein shikar kab