منزل سفر عشق کی زنہار نہ ٹوٹے

منزل سفر عشق کی زنہار نہ ٹوٹے

جب تک کمر قافلہ سالار نہ ٹوٹے

اس پند سے دل ناصح دیں دار نہ ٹوٹے

بت توڑنے میں کعبے کی دیوار نہ ٹوٹے

بے فکر رہے بندہ نقاب رخ جاناں

ہم سے کبھی قفل در گلزار نہ ٹوٹے

جب تک نہ گوارہ ہو تجھے نزع کی تلخی

پرہیز ترا اے دل بیمار نہ ٹوٹے

ہر روز ہو جب سیکڑوں عشاق کا چورنگ

اے شوخ کہاں تک تری تلوار نہ ٹوٹے

سر پٹکوں جو دیوار سے کہتا ہے وہ ظالم

بس بس مرے گھر کی کہیں دیوار نہ ٹوٹے

بے جا ہے تری گرمئ بازار کا شکوہ

کیوں جنس نئی پا کے خریدار نہ ٹوٹے

قسمت میں ہو گو منزل مقصد کا پہنچنا

پر آبلۂ پا میں سر خار نہ ٹوٹے

آساں ہے شہیدیؔ کی اگر دل شکنی ہو

پر شرط یہ ہے خاطر اغیار نہ ٹوٹے

manzil safar-e-ishq ki zinhar na tute

jab tak kamar-e-qafila salar na tute

is pand se dil naseh den dar na tute

but torne mein kaabe ki diwar na tute

be fikr rahe banda naqab-e-rukh janan

ham se kabhi qufl-e-dar gulzar na tute

jab tak na gawara ho tujhe nazaa ki talkhi

parhez tira ai dil-e-bimar na tute

har roz ho jab saikron ushshaq ka chaurang

ai shokh kahan tak tiri talwar na tute

sar patkun jo diwar se kahta hai wo zalim

bas bas mire ghar ki kahin diwar na tute

be ja hai tiri garmi-e-bazar ka shikwa

kyun jins nai pa ke kharidar na tute

qismat mein ho go manzil-e-maqsad ka pahunchna

par abla-e-pa mein sar-e-khar na tute

asan hai shahidi ki agar dil shikani ho

par shart ye hai khatir-e-aghyar na tute