بلقیس پاسباں ہے یہ کس کی جناب ہے

بلقیس پاسباں ہے یہ کس کی جناب ہے

مریم درود خواں ہے یہ کس کی جناب ہے

شان خدا عیاں ہے یہ کس کی جناب ہے

دہلیز آسماں ہے یہ کس کی جناب ہے

کرسی زمیں سے لیتی ہے گوشے پناہ کے

بیٹھا ہے عرش سائے میں اس بارگاہ کے

حوران ہشت خلد ہیں اک اہتمام کو

دار السلام در پہ جھکا ہے سلام کو

سجدہ یہیں حلال ہے بیت الحرام کو

سورج نثار صبح کو ہے چاند شام کو

دیکھا کرے کھڑے ہوئے اس آستان کو

یاں بیٹھنے کا حکم نہیں آسمان کو

صحرائے لامکاں کی فضا اس سے تنگ ہے

جنت کا نام اس کی بزرگی کا ننگ ہے

فضل خدا کے سایہ کا ہر جا پہ ڈھنگ ہے

یاں دھوپ میں بھی کاغذ ابیض کا رنگ ہے

زائر کو اس حریم کے عیش و نشاط ہے

اس کا بچھونا رحمت حق کی بساط ہے

عفت پکارتی ہے مقام حجاب ہے

شیعو، جناب فاطمہؑ کی یہ جناب ہے

حوا و آسیہ کا یہ باہم خطاب ہے

زہرا کے رعب و دبدبہ سے زہرہ آب ہے

جاری ہے منہ سے جاریۂ فاطمہؑ ہیں ہم

مخدومہ جہاں کی وہ اک خادمہ ہیں ہم

ہر خشت روضہ دفتر حکمت کی فرد ہے

معدوم یاں زمانے کا ہر گرم و سرد ہے

یاں غم کا ہے غبار نہ کلفت کی گرد ہے

پر صاحب رواق کے پہلو میں درد ہے

ہم تم یہ جانتے تھے کہ سوتی ہیں فاطمہؑ

اس کی خبر نہیں ہے کہ روتی ہیں فاطمہؑ

شان خدا ہے صل علیؑ ٰ شان فاطمہؑ

حیدر کی جا نماز ہے دامان فاطمہؑ

روزہ ہر ایک روز ہے مہمان فاطمہؑ

کہتی ہے عید فطر میں قربان فاطمہؑ

بہر نماز قوت کی تقلیل کرتی ہیں

تسبیح حق میں آپ کو تہلیل کرتی ہیں

مدہوش ہیں فضائل زہراؑ میں چشم و گوش

خود بے لباس اور خلایق کی پردہ پوش

عسرت سے بے حواس مگر یاد حق کا ہوش

فاقہ سے چہرہ خشک پہ دریا دلی کا جوش

مستغنی المزاج ہیں عالم نواز ہیں

زیور سے مثل ذات خدا بے نیاز ہیں

باغ فدک جو غصب ستم گار نے کیا

تپ کو مطیع فاطمہؑ غفار نے کیا

حاکم ہر ایک درد کا مختار نے کیا

زہراؑ نے جو کہا وہ ہر آزار نے کیا

صادق سے اس بیان کی صحت حصول ہے

روشن دعائے نور سے شان بتول ہے

رخ جلوہ گاہ قدرت پروردگار ہے

دل رازدار خلوت پروردگار ہے

سر جاں نثار رحمت پروردگار ہے

تن خاکسار طاعت پروردگار ہے

تسبیح سے عیاں شرف فاطمہؑ ہوا

ذکر خدا کا فاطمہؑ پر خاتمہ ہوا

باغوں میں خلد نہروں میں کوثر ہے انتخاب

قبلوں میں کعبہ مصحفوں میں آخری کتاب

تاروں میں آفتاب مبیں پھولوں میں گلاب

سب عورتوں میں فاطمہؑ مردوں میں بوتراب

شاہ زنان وقت مسیحا کی ماں ہوئیں

زہرا ہر ایک عصر میں شاہ زناں ہوئیں

الفت خدا کے بعد حبیب خدا کی ہے

منصب کے آگے یہ بھی دلا کبریا کی ہے

پروا نہ فاقہ کی نہ شکایت جفا کی ہے

ایذا فقط جدائی خیرالورا کی ہے

آب و غذا کی فکر نہ سونے کا دھیان ہے

آنکھوں میں شکل باپ کی رونے کا دھیان ہے

کچھ نوش کر لیا جو کسی نے کھلا دیا

لیکن عزا میں کچھ نہ غذا نے مزا دیا

غش میں کسی نے آ کے جو پانی پلا دیا

قطرہ پیا اور آنکھوں سے دریا بہا دیا

نسبت ہے کس سے فاطمہؑ کے شور و شین کو

زہراؑ کے بعد روئی ہیں زینب حسینؑ کو

سن کم قلق زیادہ قلق سے فغاں سوا

سینہ سے دل تو دل سے جگر ناتواں سوا

رونے سے چشم پاک ہوئی خوں فشاں سوا

تپ وہ کہ نبضوں سے طپش استخواں سوا

جب فاطمہؑ نے ہائے پدر کہہ کے آہ کی

ہلنے لگی ضریح رسالت پناہ کی

فضہ کنیز فاطمہؑ کرتی ہے یہ بیاں

گھر سے ہوا جنازہ پیمبر کا جب رواں

بیٹھی کی بیٹھی رہ گئی مخدومۂ جہاں

اک ہفتہ رات دن رہیں حجرے میں نیم جاں

دیکھا جو میں نے جھانک کے تو آنکھ بند ہے

آواز آہ آہ کی دل سے بلند ہے

بیٹے پکارتے ہیں یہ للٰلہ باہر آؤ

اماں نہ اتنا روؤ غلاموں پہ رحم کھاؤ

نانا کہاں گئے ہیں بلا لائیں ہم بتاؤ

ہم کرتے پھاڑتے ہیں نہیں تو گلے لگاؤ

نانا کے بعد ہائے یہ بے قدر ہم ہوئے

سب کی طرف حضور کے بھی پیار کم ہوئے

ہمسائیاں یہ کہتی تھیں اے عاشق پدر

دیدار مصطفی تو ہے موقوف حشر پر

ان کے عوض تو اپنی زیارت سے شاد کر

حجرے میں پیٹتی ہے یہ کہہ کر وہ نوحہ گر

اب میں ہوں اور ہر ایک حقارت ہے صاحبو

مجھ بے پدر کی خاک زیارت ہے صاحبو

القصہ بعد ہفتہ کے دن آٹھواں ہوا

اور نیل پوش ظلمت شب سے جہاں ہوا

یاں مہر برج حجرۂ ماتم عیاں ہوا

پر اس طرح کہ مردہ کا سب کو گماں ہوا

یہ شکل ہوگئی تھی عزا میں رسول کی

پہچانی بیٹیوں نے نہ صورت بتول کی

وہ وقت شام اور اندھیرا ادھر ادھر

ششدر ہر ایک رہ گیا منہ دیکھ دیکھ کر

زینب نے جا کے حجرہ میں ڈھونڈا بچشم تر

چلائی وہ کہ ہائے نکل جاؤں میں کدھر

ماں میری کیا ہوئیں میں قلق سے ملول ہوں

مڑ کر پکاریں آپ میں ہی تو بتول ہوں

فضہ بیان کرتی ہے اس وقت کا یہ حال

تن زار ہو کے بن گیا تھا صورت ہلال

ماتم کے نیل سینے پہ رونے سے آنکھیں لال

منہ زرد ہونٹ خشک پریشان سر کے بال

روتی چلیں مزار رسول انام کو

جس طرح شمع گور غریباں ہو شام کو

اندھیر فاطمہؑ کے نکلنے سے ہوگیا

طوفان نوح اشکوں کے ڈھلنے سے ہوگیا

برہم زمانہ ہاتھوں کے ملنے سے ہوگیا

عاجز فلک بھی راہ کے چلنے سے ہوگیا

حوا کفن سے قبر میں منہ ڈھانپنے لگی

آدم لحد میں تڑپے زمیں کانپنے لگی

جز اشک دونوں آنکھوں میں ہر شے تھی خار خار

گر کر ردا الجھتی تھی قدموں سے بار بار

تھا ماتمی قبا کا گریبان تار تار

دل تھا نحیف و زار پہ روتی تھی زار زار

جب آہ کی تو چار طرف بجلیاں گریں

تھرا کے یاں گریں کبھی غش کھا کے واں گریں

قدسی کھڑے تھے عرش معلیؑ کے آس پاس

تسبیح کی خبر تھی نہ تجلیل کے حواس

دوزخ جدا خروش میں مالک جدا اداس

غلمان و حور و جن و پری پر ہجوم یاس

غل تھا کہ سب کے دل کو ہلاتی ہیں فاطمہؑ

قبر رسولؐ پاکؑ پر آتی ہیں فاطمہؑ

رستہ سے لوگ فضہ نے بڑھ کر ہٹا دیے

ہمسائیوں نے غرفوں کے پردے گرا دیے

مردوں کے منہ پہ دوڑ کے داماں اڑھا دیے

سب نے چراغ اپنے گھروں کے بجھا دیے

کہتی تھیں فاطمہؑ کے پدر کا یہ شہر ہے

نامحرموں نے بی بی کو دیکھا تو قہر ہے

یثرب میں وقت شام یہ زہراؑ کا تھا ادب

دن کو پھرایا بلوے میں زینب کو ہے غضب

القصہ آئی قبر پہ وہ کشتۂ تعب

پر کس گھڑی کہ ہلتی تھی قبر رسولؐ رب

تربت کے گرد پھرنے سے طاقت جو گھٹ گئی

لے کر بلائیں قبر سے زہراؑ لپٹ گئی

چلائی آہ و ابتا و محمدؐا

نورالہ وا ابتا وا محمداؐ

شاہوں کے شاہ و ابتا و محمداؐ

وا سیداہ وا ابتا وا محمداؐ

بابا بتول آئی ہے تسلیم کے لیے

اٹھیے یتیم بیٹی کی تعظیم کے لیے

گزرے ہیں آٹھ دن کی زیارت نہیں ہوئی

اس بے نصیب سے کوئی خدمت نہیں ہوئی

منبر ہے سونا وعظ و نصیحت نہیں ہوئی

مسجد میں بھی نماز جماعت نہیں ہوئی

حضرتؐ کے منہ سے وحیٔ خدا بھی نہیں سنی

جبریلؑ کے پروں کی صدا بھی نہیں سنی

حجرہ وہی ہے گھر ہے وہی ایک تم نہیں

تارے وہی قمر ہے وہی ایک تم نہیں

شب ہے وہی سحر ہے وہی ایک تم نہیں

ہے ہے یہ بے ہےپدر ہے وہی ایک تم نہیں

دیتے ہیں سب دعا کہ شفا پائے فاطمہؑ

اور فاطمہؑ یہ کہتی ہے مر جائے فاطمہؑ

تسلیم میری اے پدر ہےنامدار لو

تربت پہ اپنی تم مجھے صدقے اتار لو

قربان تم پہ ہوں خبر دل فگار لو

مشتاق ہوں کہ فاطمہؑ کہہ کر پکار لو

پوچھو یہ تم مزاج تمہارا بخیر ہے

لونڈی کہے کہ حال جدائی سے غیر ہے

دل کس کا غم میں آپ کے نوحہ کناں نہیں

وہ کون گھر ہے جس میں کہ آہ و فغاں نہیں

آنسو وہ کون ہے جو مسلسل رواں نہیں

امت پہ آپ سا تو کوئی مہرباں نہیں

خالق کے بعد بندوں کے جو کچھ تھے آپ تھے

بیوؤں کے پردہ دار یتیموں کے باپ تھے

خواہاں ہر ایک دم رہے امت کے چین کے

کی مہر تم نے قتل پہ میرے حسینؑ کے

احساں ہیں شیعوں پر نبیؐ مشرقین کے

نعرے بلند کرتے ہیں سب شور و شین کے

بے حشر کے تمہاری زیارت نہ ہوئے گی

ہو گی وہ کون آنکھ جو تم پر نہ روئے گی

آساں پسر کا داغ ہے مشکل پدر کا داغ

وہ کچھ دنوں کا داغ ہے یہ عمر بھر داغ

یہ تن بدن کا داغ ہے وہ اک جگر کا داغ

پیدا ہوا پسر تو مٹا اس پسر کا داغ

اولاد کا بدل ہے پدر کا بدل نہیں

یہ درد ہے کہ جس کی دوا جز اجل نہیں

اور باپ بھی وہ باپ کہ سر تاج انبیا

نور خدا جلال خدا رحمت خدا

روز ازل سے تا بہ ابد کل کا پیشوا

بیٹی پہ صدقے بیٹی کے بچوں پہ بھی فدا

کیوں کر نہ اپنی موت تجھے اب قبول ہو

دنیا میں ایسا باپ نہ ہو اور بتول ہو

کیا سو رہے ہو قبر میں تنہا جواب دو

چلا رہی ہے آپ کی زہراؑ جواب دو

مولا جواب دو مرے آقا جواب دو

دل مانتا نہیں میں کروں کیا جواب دو

بولو میں صدقے جاؤں بہت دل ملول ہوں

بابا بتول ہوں میں تمہاری بتول ہوں

پھرتے تھے جب سفر سے مرے پاس آتے تھے

لونڈی سے بے ملے کبھی باہر نہ جاتے تھے

فاقہ مرا جو سنتے تھے کھانا نہ کھاتے تھے

جو جو میں ناز کرتی تھی حضرتؐ اٹھاتے تھے

کیسی حقیر بعد رسول کریم ہوں

در یتیم آگے تھی اب تو یتیم ہوں

بابا اذاں بلال کے منہ کی مجھے سناؤ

بابا نمازی آئے ہیں مسجد میں تم بھی جاؤ

بابا وصی کواپنے بلا کر گلے لگاؤ

بابا نواسے ڈھونڈھتے پھرتے ہیں منہ دکھاؤ

اک اک گھڑی پہاڑ ہے مجھ دل ملول کو

بابا کہو بلاؤ گے کس دن بتول کو

پھرتی ہے یاں سکینہؑ کی عزت نگاہ میں

زہراؑ نبیؐ کی قبر پہ تھی اشک و آہ میں

آئے جو اونٹ بیوؤں کے مقتل کی راہ میں

بے ساختہ سکینہؑ گری قتل گاہ میں

بیداد اہل ظلم نے کی شور و شین پر

رونے دیا نہ بیٹی کو لاش حسینؑ پر

القصہ فاطمہؑ ہوئی بے ہوش قبر پر

زینب کے پاس دوڑی گئی فضہ ننگے سر

زینب نے پوچھا خیر تو ہے بولی پیٹ کر

جامہ نبیؐ کا دو تو سنگھاؤں میں نوحہ گر

ہمسائیاں ہیں گرد ہراساں کھڑی ہوئیں

بی بی کی اماں جان ہیں غش میں پڑی ہوئیں

نانا کا خاص جامہ نواسی نے لا دیا

فضہ نے جا کے بی بی کو غش میں سنگھا دیا

خوشبو نے اس کی روح کو ایسا مزا دیا

جامہ پہ بوسہ فاطمہؑ نے جا بہ جا دیا

پڑھ کر درود بات سنائی وہ یاس کی

تو بیبیاں تڑپنے لگیں آس پاس کی

دل کا سخن ہے آہ پکاری وہ بے پدر

یعقوب نے جو سونگھا تھا پیراہن پسر

یوسف کے دیکھنے کی توقع تھی کس قدر

میری امید قطع ہے بابا سے عمر بھر

پوچھوں کہاں تلاش کروں کس دیار میں

یوسف تو میرا سوتا ہے لوگو مزار میں

رونے لگیں یہ کہہ کے وہ خاتون نیک ذات

گھر میں زنان ہاشمیہ لائیں ہاتھوں ہاتھ

کافر بھی رحم کھائے جو دیکھے یہ واردات

امت کا اب سلوک سنو فاطمہؑ کے ساتھ

نظروں سے نور چشم نبیؐ کو گرا دیا

دروازۂ علیؑ دلی کو گرا دیا

آگے نہ سن سکیں گے غلامان فاطمہؑ

در کے تلے بلند ہے افغان فاطمہؑ

کیا وقت بے کسی ہے میں قربان فاطمہؑ

رکتی ہے سانس ہونٹوں پہ ہے جان فاطمہؑ

محسن جدا تڑپتا ہے پہلو میں دل جدا

ماں مضمحل جدا ہے پسر مضمحل جدا

سہمے ہوئے حسینؑ و حسن پاس آتے ہیں

دروازہ ننھے ہاتھوں سے مل کر اٹھاتے ہیں

گھبرائیو نہ والدہ یہ کہتے جاتے ہیں

اٹھتا نہیں جو در تو علیؑ کو بلاتے ہیں

زہراؑ پکارتی تھی وصیٔ رسولؐ کو

اے ابن عم کہاں ہو بچاؤ بتول کو

سن کر یہ استغاثۂ خاتون دوسرا

یوں دوڑے مرتضیٰ کہ گری دوش سے عبا

دروازے کو اٹھایا تو اے وا مصیبتا

پہلو شکستہ لاشۂ محسن جدا ملا

دریا لہو کے دیدۂ حق بیں سے بہ گئے

اللہ رے صبر شکر خدا کر کے رہ گئے

اس پر بھی ظالموں نے نہ خوف خدا کیا

سامان قتل نائب خیر الورا کیا

انبوہ گرد حضرتؐ مشکل کشا کیا

اچھا علاج پہلوے خیر النسا کیا

گھر سے کنندۂ در خیبر کو لے چلے

چادر گلے میں باندھ کے حیدر کو لے چلے

بولا فلک میں بندۂ احساں ہوں یا علیؑ

قدرت پکاری تابع فرماں ہوں یا علیؑ

کی عرض موت نے میں نگہباں ہوں یا علیؑ

دل نے کہا میں صبر کا خواہاں ہوں یا علیؑ

بے جا نہیں گلے میں گرہ ریسماں کی ہے

ہشیار یا علیؑ یہ گھڑی امتحاں کی ہے

کیا کیا گلا رسن میں گھٹا دم خفا ہوا

پر شکر حق میں بند نہ مشکل کشا ہوا

غل تھا خدا کا شیر اسیر جفا ہوا

خیر الامم کے مرتے ہی ہے ہے یہ کیا ہوا

رسی گلے میں ہے ستم تازہ دیکھنا

ایمان کی کتاب کا شیرازہ دیکھنا

پہنچا جو بزم کفر میں وہ دیں کا کبریا

دیکھا نبیؐ کی قبر کو اور آیا یہ پڑھا

موسیٰ کے آگے ورد جو ہارون نے کیا

نکلا لرز کے پنجۂ خورشید برملا

اعجاز سے رسولؐ کے روشن جہاں ہوا

یعنی لحد سے دست مبارک عیاں ہوا

آئی ندا ارے یہ ہمارا وزیر ہے

حیدر نہیں اسیر پیمبر اسیر ہے

تم سب غلام ہو یہ تمہارا امیر ہے

کیا قہر ہے کہ دست خدا دستگیر ہے

شر کرتے ہو برادر خیرالورا سے تم

کیوں بت پرستو پھر گئے آخر خدا سے تم

ہم نے غدیر خم میں کیا تھا وصی کسے

کہتی ہے خلق صاحب ناد علیؑ کسے

مشکل کے وقت ڈھونڈتے تھے سب نبیؐ کسے

قدرت ہے یہ سوائے علیؑ ولی کسے

اول مدد سے خوش دل آدم کو کر دیا

پھر غم سے تم کو تم سے جدا غم کو کر دیا

کعبہ میں پہلے کس نے اذاں دی ہے برمحل

سویا ہے کون فرش پہ میرے مرے بدل

کس بندہ کا خدا کے لیے ہے ہر اک عمل

کس کی عطا کا عقدہ ہوا ہل اتی سے حل

توریت میں خدا نے انوشنطیا کہا

انجیل میں جو نام لیا ایلیا کہا

تشریح قل کفیٰ کی ہے کیا مرتضی علیؑ

تصریح انما کی ہے کیا مرتضی علیؑ

تفسیر لا فتا کی ہے کیا مرتضیٰ علیؑ

تاثیر ہر دعا کی ہے کیا مرتضیٰ علیؑ

گنجینۂ علوم خدا داد کون ہے

جبریل سے فرشتے کا استاد کون ہے

سب سن رہے تھے یہ کہ ہوا حشر جا بہ جا

دیکھا زنان ہاشمیہ ہیں برہنہ پا

اور ام سلمہؓ زوجۂ پیغمبر خدا

پہلو سنبھالے فاطمہؑ کا وا مصیبتا

زہراؑ خموش آنکھوں میں آنسو بھرے ہوئے

جامہ رسول پاک کا منھ پر دھرے ہوئے

پہنچیں قریب حاکم ظالم جو وہ جناب

لہجے میں مصطفےٰ کے کیا اس سے یہ خطاب

آ ہوش میں کہ صابروں کو اب نہیں ہے تاب

ہاں بال کھولتی ہوں الٹتی ہوں میں نقاب

دنیا تباہ ہوگی مرا گھر تو لٹ گیا

بس بس بہت گلا مرے والی کا گھٹ گیا

کانپی یہ سن کے مسجد پیغمبر خدا

دیواریں سب زمیں سے یکایک ہوئیں جدا

تعظیم آہ فاطمہؑ اٹھ اٹھ کے کی ادا

کھولا مخالفوں نے گلوئے شہ ہدا

گھر کو روانہ سیدۂ فاقہ کش ہوئیں

آتے ہی گر پڑیں صف ماتم پہ غش ہوئیں

قرآن لے کے بیٹیاں دوڑیں برہنہ سر

منہ پر ورق ورق کی ہوا دی بچشم تر

تب چشم نیم وا سے یہ بولی وہ بے پدر

اے بیٹیو نہ انس کرو مجھ سے اس قدر

رویت تھی جس پدر سے وہ سر پر رہا نہیں

دیکھو میں گھر میں رہنے بھی پاتی ہوں یا نہیں

کیا کیا کہوں میں دختر خیرالامم کا درد

پہلو کا درد ہاتھ کا درد اور شکم کا درد

بچوں کی بے کسی کاعلی کے الم کا درد

ہر اک غضب کا حادثہ ہر اک ستم کا درد

دو ماتم اور آہ وہ غربت بتولؔ کی

محسن کا چہلم اور سہ ماہی رسولؐ کی

منہ سے پدر کا نام لیا اور رو دیا

قرآن پڑھ کے ہدیہ کیا اور رو دیا

فرش نبی کی دیکھی ضیا اور رو دیا

تکیوں کو سونگھا بوسہ دیا اور رو دیا

صرفہ نہ آہ میں نہ بکا میں نہ بین میں

بے غش ہوئے افاقہ نہ تھا شور و شین میں

آخر وفور گریہ سے عاجز ہوئے عرب

حیدر کے پاس رونے کی فریاد لائے سب

کی عرض فاطمہؑ سے کہو اے ولیٔ رب

یا سیدی تمہاری رعایا ہے جاں بہ لب

کھانے کا کوئی وقت نہ سونے کا وقت ہے

جو وقت ہے وہ آپ کے رونے کا وقت ہے

ماں باپ نے ہماری بھی دنیا سے کی قضا

ہم تو نہ ایسا روئے نہ پیٹے نہ کی عزا

فرمایا مرتضیٰ نے کہ بتلاؤ تو بھلا

تم میں سے کس کا باپ ہوا ہے رسولؐ سا

الزام کوئی دے نہیں سکتا بتولؑ کو

سمجھاتا ہوں میں خیر یتیم رسولؐ کو

باہر سے مرتضیٰ گئے گھر میں جھکائے سر

منہ ڈھانپے رو رہی تھی اکیلی وہ خوش سیر

دینے لگے پیام عرب شاہ بحر و بر

گھبرا کے بولی ہائے کروں کیا میں نوحہ گر

قابو میں موت ہووے تو مرجاؤں یا علیؑ

بابا کا سوگ لے کے کدھر جاؤں یا علی

میری طرف سے اہل مدینہ کو دو پیام

لوگو خفا نہ ہو مری رخصت ہے صبح و شام

دو چار دن تمہارے محلہ میں ہے قیام

رونے کی دھوم ہو چکی اب کام ہے تمام

دل جس کا مردہ ہو اسے جینے سے کام کیا

بابا سدھارے مجھ کو مدینے سے کام کیا

رونے میں اختیار نہیں بے پدر ہوں میں

دل کو مرے نہ توڑو کہ خستہ جگر ہوں میں

امیدوار موت کی آٹھوں پہر ہوں میں

گر شام کو بچی تو چراغ سحر ہوں میں

ماتم ہے غیر کا کہ تمہارے رسولؐ کا

پر تم کو نا گوار ہے رونا بتولؑ کا

سب کے نبیؐ کا سوگ ہے کُل کے نبیؐ کا غم

یہ بھی نصیب اپنا کہ الزام پائیں ہم

یہ کیا سمجھ کے منہ سے نکالا کہ روؤ کم

بے رونقی رسولؐ کے ماتم کی ہے ستم

بے جا تمہاری یہ خفگی ہے میں روؤں گی

کچھ ہو مری تو جی کو لگی ہے میں روؤں گی

حیدر کا اس بیان سے ٹکڑے ہوا جگر

بیت الحزن بنایا بقیعہ میں جلد تر

لکھا ہے ہاتھ تھام کے بیٹوں کا ہر سحر

واں جا کے رویا کرتی تھی دن بھر وہ بے پدر

ہنگام شام حیدر کرار جاتے تھے

روح نبیؐ کی دے کے قسم ان کو لاتے تھے

اک دن نگاہ کرتے ہیں کیا شاہ لا فتا

مطبخ ہے گرم آرد جو ہے گندھا ہوا

نہلا رہی ہیں بچوں کو مل مل کے دست و پا

پھیلا دیے ہیں گرتے بھی دھو کر جدا جدا

پوچھا کہ اتنے کاموں کا جو شغل آج ہے

اس وقت کچھ بحال تمہارا مزاج ہے

بولیں کہ آج رات کو ہوجاؤں گی بحال

کل میرے کاروبار میں خود ہو گے تم نڈھال

خدمت کا میرے بچوں کی ہو گا کسے خیال

نہلا دھلا دیا کہ پریشاں تھے سر کے بال

کرتے بھی دھوئے قوت بھی کل تک کا دے چلی

سہرا نہ دیکھا ایک یہ ارمان لے چلی

پوچھا علیؑ نے تم کو یہ کیوں کر ہوا یقیں

صدیقہ نے کہا شدنی ہے یہ شک نہیں

پچھلے کو روتے روتے جو سوئی میں دل حزیں

دیکھا کہ ایک باغ میں ہیں شاہ مرسلیں

محسنؑ کو میرے اپنے گلے سے لگاتے ہیں

بہلاتے تھے نہ رو تری ماں کو بلاتے ہیں

مجرے کو میں جھکی تو کہا ہو کے بے قرار

زہراؑ کہاں تھی تو ترا بابا ترے نثار

آ جلد ڈھونڈھتا ہے یہ معصوم بار بار

یاں پر رہے گی چین سے میرا ہے اختیار

یاں غاصب فدک نہ کبھی آنے پائے گا

یاں تازیانہ تجھ کو نہ کوئی لگائے گا

یہ سن کے ننگے پاؤں میں اس باغ سے پھری

بس دیکھنا تھا آپ کا دیدار آخری

سہواً اگر ہوئی ہو کچھ آزردہ خاطری

بخشو مجھے کہ موت ہے نزدیک اب مری

رو کر کہا علیؑ نے کہ ہم عذر خواہ ہیں

واللہ بے قصور ہو تم سب گواہ ہیں

معصومہ سے بھی ہوتی ہے بی بی خطا کبھی

عسرت کا تم زباں پہ نہ لائیں گلا کبھی

اچھا لباس مانگا نہ اچھی غذا کبھی

بیمار جب پڑیں نہ طلب کی دوا کبھی

کیا خوب تم نے مجھ سے نباہی ہے فاطمہؑ

کیوں کر نہ ہو کہ نور الٰہی ہے فاطمہؑ

دنیا کے مال و جاہ پہ تم نے نظر نہ کی

فرمائش ایک شے کی بھی مجھ سے مگر نہ کی

یوں صبر سے جہاں میں کسی نے بسر نہ کی

فاقے کئے اور اپنے پدر کو خبر نہ کی

پہلو پہ در گرا میں حمایت نہ کر سکا

شرمندہ ہوں کہ حق رعایت نہ کرسکا

وہ بولی یہ کنیز نوازی ہے سر بسر

فرمائیے وصیت اول پہ اب نظر

ہر بے پدر کے بعد نبیؐ آپ ہیں پدر

سبطین تو حضور کے ہیں پارۂ جگر

گر چاہتے ہو قبر میں زہراؑ کے چین کو

دینا نہ رنج میرے حسنؑ اور حسینؑ کو

مغرب تلک بس اور ہے ماں ان کے سر پہ اب

کل صبح یہ گھریں گے یتیمی میں ہے غضب

پروانہ رہیو میرے چراغوں پہ روز و شب

بن ماں کا جان گر کوئی گھڑکے نہ بے سبب

یہ دونوں ہیں سپرد جناب امیر کے

جوشن ہیں آپ میرے صغیر و کبیر کے

والی یتیم بچوں کا ہوتا ہے دل حباب

چلا کے ان کی بات کا دینا نہ تم جواب

بہنوں کی ان کی ان سے سوا ہو گا اضطراب

دل جوئی ان کی کیجیو بے حد و بے حساب

زینب سے ہوشیار کہ نازوں کی پالی ہے

اور دوسرے حسینؑ کی یہ رونے والی ہے

عرض دوم یہ ہے مجھے شب کو اٹھائیو

اور قبر کا نشان کئی جا بنائیو

تربت میں خود اتاریو اور خود لٹائیو

پھر کانپ کر کہا کہ الٰہی بچائیو

آنکھوں کے آگے قبر کی تنہائی پھر گئی

موتی کی اک لڑی تھی کہ آنکھوں سے گر گئی

بولی کہ یا علیؑ یہ قیامت کا وقت ہے

مرنے سے سخت قبر کی وحشت کا وقت ہے

میت پہ بعد دفن یہ آفت کا وقت ہے

اس وقت وارثوں کی محبت کا وقت ہے

ہمدم نہیں رفیق نہیں مہرباں نہیں

یہ وہ جگہ ہے کوئی کسی کا جہاں نہیں

وہ اجنبی مکاں وہ اندھیرا ادھر ادھر

پہلے پہل وہ بستی سے ویرانے کا سفر

نے شمع روشنی کے لیے نے شگاف در

ہم سایہ وہ کہ دوسرے سے ایک بے خبر

کس کو کوئی پکارے کہاں جائے کیا کرے

آسان سب پہ قبر کی مشکل خدا کرے

اکثر تمہاری شان میں فرماتے تھے پدر

تربت میں اپنے شیعوں کی لیتے ہیں یہ خبر

امید وار میں بھی ہوں یا شاہ بحر و بر

قرآن پڑھیو قبر کے پہلو میں بیٹھ کر

مردے لحد میں بے کس و بے یار ہوتے ہیں

زندوں سے انس کے یہ طلب گار ہوتے ہیں

آئی ندا رسولؐ کی بیٹی میں آؤں گا

ہوتے ہی دفن تجھ کو گلے سے لگاؤں گا

آغوش میں لیے ہوئے جنت میں جاؤں گا

فاقہ کے بدلے میوۂ طوبیٰ کھلاؤں گا

محبوبۂ خدا و نبی تیرا نام ہے

مدفن ترے محبوں کا دارالسلام ہے

ناگاہ مہر نے کیا دنیا سے انتقال

مسجد میں مرتضیٰ گئے محزوں و خستہ حال

حجرے میں باپ کے گئی خاتون خوش خصال

اسما سے بولی مظہر اسمائے ذوالجلال

کافور خلد فاطمہؑ زہرا کے پاس لا

پانی ہمارے غسل کو لا اور لباس لا

حجرے میں غسل کر کے پڑھی آخری نماز

سجدے میں سرجھکا کے کہے اپنے دل کے راز

آواز ارجعی سے کیا حق نے سرفراز

زہرا نے اپنے پاؤں کئے قبلہ کو دراز

حوروں نے پھر بہشت میں برپا یہ غل کیا

پیٹو قضا نے شمع پیمبر کو گل کیا

یاں سب کھڑے تھے حجرے کے نزدیک بے قرار

کلمہ کے بعد جب نہ صدا آئی زینہار

حجرے میں پیٹتے ہوئے دوڑے سب ایک بار

چلائی ام سلمہ لٹی میں جگر فگار

اپنا بھی سوگوار رنڈاپے میں کر گئیں

جیتی رہی میں آپ جہاں سے گزر گئیں

پھر تو ہر ایک کوچہ میں محشر بپا ہوا

اپنے پرائے دوڑے کہ ہے ہے یہ کیا ہوا

فضہ پکاری سیدہ کا واقعا ہوا

حجرہ بتول پاک کا ماتم سرا ہوا

سینے میں دم قلق سے رکا سانس الٹ گئی

منہ رکھے منہ پہ مردے کے زینب لپٹ گئی

لے کر بلائیں کہتی تھی بیٹی نثار ہو

اماں میں ہول کھاتی ہوں تم ہوشیار ہو

بھیا زمیں پہ لوٹتے ہیں ہمکنار ہو

تم آنکھ کھول دو تو سبھوں کو قرار ہو

ہے ہے یہ چپکے رہنے کی کیا بات ہو گئی

نانا کا فاتحہ نہ دیا رات ہو گئی

اٹھیے چراغ قبر نبیؐ پر جلائیے

سونی پڑی ہے نانا کی صف جلد جائیے

پہلو کا درد کیسا ہے یہ تو بتائیے

دیکھوں میں نبض ہاتھ تو اپنا بڑھائیے

کیوں آپ کھولتی نہیں چشم پر آب کو

کیا غش میں دیکھتی ہیں رسالتؐ مآب کو

ہمسائیاں ہیں آپ کی بالیں پہ بے قرار

اور پائینتی زنان قریشی کی ہے قطار

ہے پہلوؤں میں آپ کا کنبہ سب اشکبار

سب پوچھتے ہیں آپ کو زینب سے بار بار

بی بی کہو کہاں کا پتہ دوں کدھر گئیں

یہ تو نہیں زباں سے نکلتا کہ مرگئیں

میں دودھ بخشوا بھی نہ پائی کہ چل بسیں

شربت بنا کے لانے نہ پائی کہ چل بسیں

سجادے سے اٹھانے نہ پائی کہ چل بسیں

میں بے نصیب آنے نہ پائی کہ چل بسیں

کیا جانتی تھی وقت یہ ہے انتقال کا

باعث سوا ہے یہ مرے رنج و ملال کا

اے میری فاقہ کش مری نادار والدہ

اے میری بے دوا مری بیمار والدہ

کنبہ کی آبرو مری سردار والدہ

اے میری صابرہ مری ناچار والدہ

نانا کی سوگوار کو تازہ خطاب دو

اماں جواب دو مری اماں جواب دو

ہمسائے عذر کے لیے ڈیوڑھی پہ ہیں بہم

کہتے ہیں آپ روئیں مزاحم نہ ہوں گے ہم

خاطر ہو ان کی جمع ندامت ہو ان کی کم

منہ ڈھانپ کر جو بین کریں آپ ایک دم

اتنا تو ان سے کہیے کہ احسان کیجیو

زینب جو مجھ کو روئے اسے رونے دیجیو

ناگاہ آئے روتے ہوئے شاہ اوصیا

غسل و حنوط فاطمہؑ خود حجرے میں کیا

استبرق بہشت بریں کا کفن دیا

میت کے نور سے ہوا تابوت پر ضیا

بوئے کفن میں کھول کے رخسار فاطمہؑ

مشتاقو آؤ دیکھ لو دیدار فاطمۂ

پھرنے لگیں کنیزیں جنازے کے آس پاس

جھک کر بلائیں بیٹیوں نے لیں بہ حال یاس

اب کیا کہوں کہ شدت غم سے ہے دل اداس

نزدیک ہے وہ وقت کہ سب ہوئیں بے حواس

گھر میں علیؑ لحد میں نبیؐ تھرتھراتے ہیں

بن ماں کے بیٹے ماں کے جنازے پر آتے ہیں

ننھے سے کرتوں کے ہیں گریبان چاک چاک

گیسو کھلے ہیں ڈالے ہوئے ہیں سروں پہ خاک

نزدیک ہے کہ والدہ کے غم میں ہوں ہلاک

جاری زبان پر یہی نوحہ ہے درد ناک

جاتی ہو تم نبیؐ کی زیارت کے واسطے

اماں غلام آئے ہیں رخصت کے واسطے

نانا جو پوچھیں خادموں کی خیر و عافیت

کہنا زمانہ خون کا پیاسا ہے بے جہت

بابا کے قتل کی ہے نمازوں میں مشورت

نانا ہمارے دل کو ہو اب کس کی تقویت

شفقت کا ہاتھ آپ نے سر سے اٹھا لیا

ایک والدہ تھیں پاس انہیں بھی بلا لیا

ہونے لگے وداع یہ کہہ کر وہ نیک نام

ننھے سے سر جھکا کے کیا آخری سلام

پھر تو وہ میت جگر سیدالانام

تھرائی یوں کہ بند کفن کھل گئے تمام

عاشق کو بے ملے ہوئے کس طرح کل پڑے

زہراؑ کے دونوں ہاتھ کفن سے نکل پڑے

باہیں گلے میں پیار سے بیٹوں کے ڈال دیں

اور سینہ سے لپٹ گئے جھک کر وہ نازنیں

ہاتف نے دی علیؑ کو ندا اے امیر دیں

روتے ہیں ہر فلک پہ ملک ہلتی ہے زمیں

تسکین عرش اعظم رب ہدا کرو

بیٹوں کو ماں کی لاش سے جلدی جدا کرو

منہ چوم کر یتیموں کا بولے یہ مرتضا

پیارو فرشتے روتے ہیں اب ماں سے ہو جدا

فضہ پکاری بی بی کے اعجاز پر فدا

بس عاشق حسینؑ و حسنؑ پیار ہو چکا

باہیں نکالو دفن میں اب دیر ہوتی ہے

آئی ندا کہ روح نہیں سیر ہوتی ہے

اب نذر دے یہ مرثیہ اور عرض کر دبیرؔ

یا سیدہ تمہیں قسم خالق قدیر

بہر رسول پاک و پئے حضرت امیر

تم پر فدا تھی والدۂ ذاکر حقیر

فرمائیے یہ لطف کہ وہ رستگار ہو

حلہ کفن ہو روضۂ رضواں مزار ہو

balqais-e-pasban hai ye kis ki janab hai

maryam durud khwan hai ye kis ki janab hai

shan-e-khuda ayan hai ye kis ki janab hai

dahliz asman hai ye kis ki janab hai

kursi zamin se leti hai goshe panah ke

baitha hai arsh sae mein is bargah ke

huran hasht khuld hain ik ehtimam ko

dar alssalam dar pe jhuka hai salam ko

sajda yahin halal hai bit alharam ko

suraj nisar subh ko hai chand sham ko

dekha kare khare hue is astan ko

yan baithne ka hukm nahin asman ko

sahra-e-lamakan ki faza us se tang hai

jannat ka nam us ki buzurgi ka nang hai

fazl-e-khuda ke saya ka har ja pe dhang hai

yan dhup mein bhi kaghaz abyaz ka rang hai

zair ko is harim ke aish-o-nishat hai

us ka bichhauna rahmat-e-haq ki bisat hai

iffat pukarti hai maqam-e-hijab hai

sheo, janab-e-fatima ki ye janab hai

hawwa-o-asya ka ye baham khitab hai

zahra ke rob-o-dabdaba se zohra ab hai

jari hai munh se jariya-e-fatima hain ham

makhdoma jahan ki wo ik khadama hain ham

har khisht rauza daftar-e-hikmat ki fard hai

maadum yan zamane ka har garm-o-sard hai

yan gham ka hai ghubar na kulfat ki gard hai

par sahab-e-ruaq ke pahlu mein dard hai

ham tum ye jante the ke soti hain fatima

us ki khabar nahin hai ke roti hain fatima

shan-e-khuda hai sal-e-ali shan-e-fatima

haidar ki ja namaz hai daman-e-fatima

roza har ek roz hai mehman fatima

kahti hai eid fatr mein qurban fatima

bahr namaz quwwat ki taqlil karti hain

tasbih haq mein ap ko tahlil karti hain

madhosh hain fazail-e-zahra mein chashm-o-gosh

khud be libas aur khalaeq ki parda posh

usrat se be hawas magar yad-e-haq ka hosh

faqa se chehra khushk pe dariya dili ka josh

mustaghni almizaj hain alam nawaz hain

zewar se misl-e-zat-e-khuda be niyaz hain

bagh-e-fadak jo ghasb sitam gar ne kiya

tap ko muti fatima ghaffar ne kiya

hakim har ek dard ka mukhtar ne kiya

zahra ne jo kaha wo har azar ne kiya

sadiq se is bayan ki sehhat husul hai

raushan dua-e-nur se shan-e-batul hai

rukh jalwa gah-e-qudrat-e-parwardigar hai

dil razdar-e-khalwat-e-parwardigar hai

sar jan nisar rahmat-e-parwardigar hai

tan khaksar taat-e-parwardigar hai

tasbih se ayan sharaf-e-fatima hua

zikr-e-khuda ka fatima par khatima hua

baghon mein khuld nahron mein kausar hai intikhab

qiblon mein kaaba mushfon mein akhiri kitab

taron mein aftab mubayyan phulon mein gulab

sab auraton mein fatima mardon mein botrab

shah-e-zanan waqt masiha ki man huin

zahra har ek asr mein shah-e-zanan huin

ulfat khuda ke baad habib-e-khuda ki hai

mansab ke age ye bhi dila kibriya ki hai

parwa na faqa ki na shikayat jafa ki hai

iza faqat judai khairalora ki hai

ab-o-ghiza ki fikr na sone ka dhyan hai

ankhon mein shakl bap ki rone ka dhyan hai

kuchh nosh kar liya jo kisi ne khula diya

lekin aza mein kuchh na ghiza ne maza diya

ghash mein kisi ne a ke jo pani pila diya

qatra piya aur ankhon se dariya baha diya

nisbat hai kis se fatima ke shor-o-shain ko

zahra ke baad roi hain zinib hasin ko

sun kam qalaq ziyada qalaq se fughan siwa

sina se dil to dil se jigar natawan siwa

rone se chashm-e-pak hui khun fishan siwa

tap wo ke nabzon se tapish-e-ustukhwan siwa

jab fatima ne hae pidar kah ke ah ki

hilne lagi zareh risalat panah ki

fizza kaniz fatima karti hai ye bayan

ghar se hua janaza payambar ka jab rawan

baithi ki baithi rah gai makhdoma-e-jahan

ik hafta rat din rahen hujre mein nim jan

dekha jo main ne jhank ke to ankh band hai

awaz ah ah ki dil se buland hai

bete pukarte hain ye lalla bahar ao

aman na itna roo ghulamon pe rahm khao

nana kahan gae hain bala laen ham batao

ham karte pharte hain nahin to gale lagao

nana ke baad hae ye be qadr ham hue

sab ki taraf huzur ke bhi pyar kam hue

hamsaiyan ye kahti thin ai ashiq-e-pidar

didar mustafa to hai mauquf hashr par

un ke ewaz to apni ziyarat se shad kar

hujre mein pitti hai ye kah kar wo nauha gar

ab main hun aur har ek hiqarat hai sahabo

mujh be pidar ki khak ziyarat hai sahabo

alqissa baad hafta ke din athwan hua

aur nil posh zulmat-e-shab se jahan hua

yan mehr burj hujra-e-matam ayan hua

par is tarah ke murda ka sab ko guman hua

ye shakl hogai thi aza mein rasul ki

pahchani betiyon ne na surat batul ki

wo waqt-e-sham aur andhera idhar idhar

shashdar har ek rah gaya munh dekh dekh kar

zinib ne ja ke hujra mein dhunda bachashm-e-tar

chillai wo ke hae nikal jaun main kidhar

man meri kya huin mein qalaq se malul hun

mur kar pukaren ap mein hi to batul hun

fizza bayan karti hai is waqt ka ye hal

tan zar ho ke ban gaya tha surat-e-hilal

matam ke nil sine pe rone se ankhen lal

munh zard hont khushk pareshan sar ke bal

roti chalen mazar-e-rasul-e-anam ko

jis tarah shama gor-e-ghariban ho sham ko

andher fatima ke nikalne se hogaya

tufan-e-nuh ashkon ke dhalne se hogaya

barham zamana hathon ke milne se hogaya

ajiz falak bhi rah ke chalne se hogaya

hawwa kafan se qabr mein munh dhanpne lagi

adam lahad mein tarpe zamin kanpne lagi

juz ashk donon ankhon mein har shai thi khar khar

gir kar rida ulajhti thi qadmon se bar bar

tha matami qaba ka gareban tar tar

dil tha nahif-o-zar pe roti thi zar zar

jab ah ki to char taraf bijliyan giren

tharra ke yan giren kabhi ghash kha ke wan giren

qudsi khare the arsh-e-mualla ke as pas

tasbih ki khabar thi na tajlil ke hawas

dozakh juda kharosh mein malik juda udas

ghilman-o-hur-o-jin-o-pari pur hujum yas

ghul tha ke sab ke dil ko hilati hain fatima

qabr-e-rasul-e-pak par ati hain fatima

rasta se log fizza ne barh kar hata diye

hamsaiyon ne ghurfon ke parde gira diye

mardon ke munh pe daur ke daman urha diye

sab ne charagh apne gharon ke bujha diye

kahti thin fatima ke pidar ka ye shahr hai

namahramon ne bi bi ko dekha to qahr hai

yasrab mein waqt-e-sham ye zahra ka tha adab

din ko pharaya balwe mein zinib ko hai ghazab

alqissa ai qabr pe wo kushta-e-taab

par kis ghari ke hilti thi qabr-e-rasul-e-rab

turbat ke gard phirne se taqat jo ghut gai

le kar balaen qabr se zahra lipat gai

chillai ah-o-ubta-o-mahmada

naurala wa ubta wa mahmada

shahon ke shah-o-ubta-o-mahmada

wa sayyada wa ubta wa mahmada

baba batul ai hai taslim ke liye

uthiye yatim beti ki taazim ke liye

guzre hain ath din ki ziyarat nahin hui

us be nasib se koi khidmat nahin hui

mimbar hai sona waaz-o-nasihat nahin hui

masjid mein bhi namaz-e-jamaat nahin hui

hazrat ke munh se wahi-e-khuda bhi nahin suni

jibril ke paron ki sada bhi nahin suni

hujra wahi hai ghar hai wahi ek tum nahin

tare wahi qamar hai wahi ek tum nahin

shab hai wahi sahar hai wahi ek tum nahin

hai hai ye be haipidar hai wahi ek tum nahin

dete hain sab dua ke shifa pae fatima

aur fatima ye kahti hai mar jae fatima

taslim meri ai pidar hainamdar lo

turbat pe apni tum mujhe sadqe utar lo

qurban tum pe hun khabar-e-dil figar lo

mushtaq hun ke fatima kah kar pukar lo

puchho ye tum mizaj tumhara bakhair hai

laundi kahe ke hal judai se ghair hai

dil kis ka gham mein ap ke nauha kunan nahin

wo kaun ghar hai jis mein ke ah-o-fughan nahin

ansu wo kaun hai jo musalsal rawan nahin

ummat pe ap sa to koi mehrban nahin

khaliq ke baad bandon ke jo kuchh the ap the

biyoun ke parda dar yatyimon ke bap the

khwahan har ek dam rahe ummat ke chain ke

ki mehr tum ne qatl pe mere hasin ke

ehsan hain shion par nabi mashriqain ke

naare buland karte hain sab shor-o-shain ke

be hashr ke tumhari ziyarat na hue gi

hogi wo kaun ankh jo tum par na ru-e-gi

asan pisar ka dagh hai mushkil pidar ka dagh

wo kuchh dinon ka dagh hai ye umr bhar dagh

ye tan badan ka dagh hai wo ik jigar ka dagh

paida hua pisar to mita is pisar ka dagh

aulad ka badal hai pidar ka badal nahin

ye dard hai ke jis ki dawa juz ajal nahin

aur bap bhi wo bap ke sar taj-e-ambiya

nur-e-khuda jalal khuda rahmat-e-khuda

roz-e-azal se ta ba abad kal ka peshwa

beti pe sadqe beti ke bachchon pe bhi fida

kyun kar na apni maut tujhe ab qubul ho

duniya mein aisa bap na ho aur batul ho

kya so rahe ho qabr mein tanha jawab-e-do

chilla rahi hai ap ki zahra jawab-e-do

maula jawab-e-do mire aqa jawab-e-do

dil manta nahin main karun kya jawab-e-do

bolo main sadqe jaun bahut dil malul hun

baba batul hun main tumhari batul hun

phirte the jab safar se mire pas ate the

laundi se be mile kabhi bahar na jate the

faqa mira jo sunte the khana na khate the

jo jo main naz karti thi hazrat uthate the

kaisi haqir baad rasul-e-karim hun

dar-e-yatim age thi ab to yatim hun

baba azan bilal ke munh ki mujhe sunao

baba namazi ae hain masjid mein tum bhi jao

baba wassi kuwwapanne bala kar gale lagao

baba nawase dhundhte phirte hain munh dikhao

ik ik ghari pahar hai mujh dil malul ko

baba kaho bulaoge kis din batul ko

phirti hai yan sakina ki izzat nigah mein

zahra nabi ki qabr pe thi ashk-o-ah mein

ae jo unt biyoun ke maqtal ki rah mein

be sakhta sakina giri qatl gah mein

bedad ahl-e-zulm ne ki shor-o-shain par

rone diya na beti ko lash-e-hasin par

alqissa fatima hui be hosh qabr par

zinib ke pas dauri gai fizza nange sar

zinib ne puchha khair to hai boli pet kar

jama nabi ka do to singhaon mein nauha gar

hamsaiyan hain gard hirasan khari huin

bi bi ki aman jan hain ghash mein pari huin

nana ka khas jama nawasi ne la diya

fizza ne ja ke bi bi ko ghash mein singha diya

khushbu ne us ki ruh ko aisa maza diya

jama pe bosa fatima ne ja ba ja diya

parh kar durud bat sunai wo yas ki

tu bebayan tarapne lagen as pas ki

dil ka sukhan hai ah pukari wo be pidar

yaaqub ne jo sungha tha pairahan-e-pisar

yusuf ke dekhne ki tawaqqo thi kis qadar

meri umid qata hai baba se umr bhar

puchhun kahan talash karun kis dayar mein

yusuf to mera sota hai logo mazar mein

rone lagen ye kah ke wo khatun nek zat

ghar mein zanan hashimye laen hathon hath

kafir bhi rahm khae jo dekhe ye wardat

ummat ka ab suluk suno fatima ke sath

nazron se nur-e-chashm-e-nabi ko gira diya

darwaza-e-ali dili ko gira diya

age na sun sakenge ghulaman-e-fatima

dar ke tale buland hai afghan fatima

kya waqt-e-be kisi hai main qurban fatima

rukti hai sans honton pe hai jan-e-fatima

mohsin juda tarapta hai pahlu mein dil juda

man muzmahil juda hai pisar muzmahil juda

sahme hue hasin-o-husn pas ate hain

darwaza nanhe hathon se mil kar uthate hain

ghabraiyo na walida ye kahte jate hain

uthta nahin jo dar to ali ko bulate hain

zahra pukarti thi wassi-e-rasul ko

ai ibn-e-am kahan ho bachao batul ko

sun kar ye istighasa-e-khatun dusra

yun daure murtaza ke giri dosh se aba

darwaze ko uthaya to ai wa masibata

pahlu shikasta lasha-e-mohsin juda mila

dariya lahu ke dida-e-haq bin se ba gae

allah re sabr shukr-e-khuda kar ke rah gae

us par bhi zalimon ne na khauf-e-khuda kiya

saman-e-qatl naib khair alwara kya

amboh gard hazrat-e-mushkil kusha kya

achchha ilaj-e-pahalwe khair-e-alnnasa kya

ghar se kaninda-e-dar-e-khaibar ko le chale

chadar gale mein bandh ke haidar ko le chale

bola falak mein banda-e-ehsan hun ya ali

qudrat pukari tabe-e-farman hun ya ali

ki arz maut ne main nigahban hun ya ali

dil ne kaha main sabr ka khwahan hun ya ali

be ja nahin gale mein girah resman ki hai

hushyar ya ali ye ghari imtihan ki hai

kya kya gila rasan mein ghata dam khafa hua

par shukr haq mein band na mushkil kusha hua

ghul tha khuda ka sher asir-e-jafa hua

khair alumam ke marte hi hai hai ye kya hua

rassi gale mein hai sitam-e-taza dekhna

iman ki kitab ka shiraza dekhna

pahuncha jo bazm-e-kufr mein wo den ka kibriya

dekha nabi ki qabr ko aur aya ye parha

musa ke age wird jo harun ne kiya

nikla laraz ke panja-e-khurshid barmala

ejaz se rasul ke raushan jahan hua

yaani lahad se dast-e-mubarak ayan hua

ai nida are ye hamara wazir hai

haidar nahin asir-e-payambar asir hai

tum sab ghulam ho ye tumhara amir hai

kya qahr hai ke dast-e-khuda dastgir hai

shar karte ho baradar khairalora se tum

kyun but purastu phir gae akhir khuda se tum

ham ne ghadir kham mein kya tha wassi-e-kise

kahti hai khalq sahab nad ali kise

mushkil ke waqt dhundte the sab nabi kise

qudrat hai ye siwae ali wali kise

awwal madad se khush dil-e-adam ko kar diya

phir gham se tum ko tum se juda gham ko kar diya

kaaba mein pahle kis ne azan di hai barmahal

soya hai kaun farsh pe mere mire badal

kis banda ka khuda ke liye hai har ik amal

kis ki ata ka uqda hua hal iti se hal

taurait mein khuda ne anoshnatiya kaha

injil mein jo nam liya eliya kaha

tashrih qul kafi ki hai kya murtaza ali

tasrih anma ki hai kiya murtaza ali

tafsir la fata ki hai kya murtaza ali

tasir har dua ki hai kya murtaza ali

ganjina-e-ulum-e-khuda dad kaun hai

jibril se farishte ka ustad kaun hai

sab sun rahe the ye ke hua hashr ja ba ja

dekha zanan hashimye hain barahna pa

aur um sallama zauja-e-paighambar-e-khuda

pahlu sambhale fatima ka wa masibata

zahra khamosh ankhon mein ansu bhare hue

jama rasul-e-pak ka munh par dhare hue

pahunchen qarib hakim zalim jo wo janab

lahje mein mustafae ke kiya us se ye khitab

a hosh mein ke sabiron ko ab nahin hai tab

han bal kholti hun ulatti hun main naqab

duniya tabah hogi mira ghar to lut gaya

bas bas bahut gila mire wali ka ghut gaya

kanpi ye sun ke masjid paighambar-e-khuda

diwaren sab zamin se yakayak huin juda

taazim ah fatima uth uth ke ki ada

khola mukhalifon ne galo-e-shah-e-hada

ghar ko rawana sida-e-faqa kash-e-huin

ate hi gar paren saf-e-matam pe ghash huin

quran le ke betiyan dauren barahna sar

munh par waraq waraq ki hawa di bachashm-e-tar

tab chashm-e-nim wa se ye boli wo be pidar

ai betiyo na uns karo mujh se is qadar

ruyat thi jis pidar se wo sar par raha nahin

dekho mein ghar mein rahne bhi pati hun ya nahin

kya kya kahon main dukhtar khairalumam ka dard

pahlu ka dard hath ka dard aur shikam ka dard

bachchon ki be kisi kaali ke alam ka dard

har ik ghazab ka hadisa har ik sitam ka dard

do matam aur ah wo ghurbat batul ki

mohsin ka chehlum aur sah mahi rasul ki

munh se pidar ka nam liya aur ro diya

quran parh ke hadya kiya aur ro diya

farsh-e-nabi ki dekhi ziya aur ro diya

takiyon ko sungha bosa diya aur ro diya

sarfa na ah mein na buka mein na bain mein

be ghash hue ifaqa na tha shor-o-shain mein

akhir wafur-e-girya se ajiz hue arab

haidar ke pas rone ki fariyad lae sab

ki arz fatima se kaho ai wali-e-rab

ya sidi tumhari riaya hai jan ba lab

khane ka koi waqt na sone ka waqt hai

jo waqt hai wo ap ke rone ka waqt hai

man bap ne hamari bhi duniya se ki qaza

ham to na aisa roe na pite na ki aza

farmaya murtaza ne ke batlao to bhala

tum mein se kis ka bap hua hai rasul sa

ilzam koi de nahin sakta batul ko

samjhata hun main khair yatim rasul ko

bahar se murtaza gae ghar mein jhukae sar

munh dhanpe ro rahi thi akeli wo khush sair

dene lage payam arab shah-e-bahr-o-bar

ghabra ke boli hae karun kya main nauha gar

qabu mein maut howe to marjaun ya ali

baba ka sog le ke kidhar jaun ya ali

meri taraf se ahl-e-madina ko do payam

logo khafa na ho miri rukhsat hai subh-o-sham

do char din tumhare mohalla mein hai qayam

rone ki dhum ho chuki ab kam hai tamam

dil jis ka murda ho use jine se kam kya

baba sidhare mujh ko madine se kam kya

rone mein ikhtiyar nahin be pidar hun main

dil ko mire na toro ke khasta jigar hun main

umidwar maut ki athon pahar hun main

gar sham ko bachi to charagh-e-sahar hun main

matam hai ghair ka ke tumhare rasul ka

par tum ko na gawar hai rona batul ka

sab ke nabi ka sog hai kul ke nabi ka gham

ye bhi nasib apna ke ilzam paen ham

ye kya samajh ke munh se nikala ke roo kam

be raunaqi rasul ke matam ki hai sitam

be ja tumhari ye khafagi hai main roungi

kuchh ho miri to ji ko lagi hai main roungi

haidar ka is bayan se tukre hua jigar

bit alhazan banaya baqeh mein jald tar

likha hai hath tham ke beton ka har sahar

wan ja ke roya karti thi din bhar wo be pidar

hangam-e-sham-e-haidar-e-karrar jate the

ruh-e-nabi ki de ke qasam un ko late the

ik din nigah karte hain kya shah la fata

mutbakh hai garm ard jo hai gindha hua

nahla rahi hain bachchon ko mil mil ke dast-o-pa

phaila diye hain girte bhi dho kar juda juda

puchha ke itne kamon ka jo shaghl aj hai

is waqt kuchh bahal tumhara mizaj hai

bolen ke aj rat ko hojaun gi bahal

kal mere karobar mein khud hoge tum nidhal

khidmat ka mere bachchon ki hoga kise khayal

nahla dhula diya ke pareshan the sar ke bal

karte bhi dhoe quwwat bhi kal tak ka de chali

sehra na dekha ek ye arman le chali

puchha ali ne tum ko ye kyun kar hua yaqin

sadeqa ne kaha shudani hai ye shak nahin

pichhle ko rote rote jo soi mein dil hazin

dekha ke ek bagh mein hain shah mursalen

mohsin ko mere apne gale se lagate hain

bahlate the na ro tiri man ko bulate hain

mujre ko main jhuki to kaha ho ke be qarar

zahra kahan thi to tira baba tire nisar

a jald dhundhta hai ye maasum bar bar

yan par rahegi chain se mera hai ikhtiyar

yan ghasib-e-fadak na kabhi ane paega

yan taziyana tujh ko na koi lagaega

ye sun ke nange paon mein is bagh se phiri

bas dekhna tha ap ka didar akhiri

sahwan agar hui ho kuchh azurda khatiri

bakhsho mujhe ke maut hai nazdik ab miri

ro kar kaha ali ne ke ham uzr khwah hain

wallah be qusur ho tum sab gawah hain

maasomah se bhi hoti hai bi bi khata kabhi

usrat ka tum zaban pe na laen gila kabhi

achchha libas manga na achchhi ghiza kabhi

bimar jab paren na talab ki dawa kabhi

kya khub tum ne mujh se nibahi hai fatima

kyun kar na ho ke nur-e-ilahi hai fatima

duniya ke mal-o-jah pe tum ne nazar na ki

farmaish ek shai ki bhi mujh se magar na ki

yun sabr se jahan mein kisi ne basar na ki

faqe kiye aur apne pidar ko khabar na ki

pahlu pe dar gira mein himayat na kar saka

sharminda hun ke haq riayat na karsaka

wo boli ye kaniz nawazi hai sar basar

farmaiye wasyyat awwal pe ab nazar

har be pidar ke baad nabi ap hain pidar

sibtain to huzur ke hain para-e-jigar

gar chahte ho qabr mein zahra ke chain ko

dena na ranj mere husn aur hasin ko

maghrib talak bas aur hai man un ke sar pe ab

kal subh ye ghirenge yatimi mein hai ghazab

parwana rahiyo mere charaghon pe roz-o-shab

ban man ka jan gar koi ghurke na be sabab

ye donon hain supurd janab-e-amir ke

joshan hain ap mere saghir-o-kabir ke

wali yatim bachchon ka hota hai dil habab

chilla ke un ki bat ka dena na tum jawab

bahnon ki un ki un se siwa hoga iztirab

dil joi un ki kijiyo be had-o-be hisab

zinib se hoshyar ke nazon ki pali hai

aur dusre hasin ki ye rone wali hai

arz-e-duwam ye hai mujhe shab ko uthaiyo

aur qabr ka nishan kai ja bunaiyo

turbat mein khud utariyo aur khud lataiyo

phir kanp kar kaha ke ilahi bachaiyo

ankhon ke age qabr ki tanhai phir gai

moti ki ik lari thi ke ankhon se gir gai

boli ke ya ali ye qayamat ka waqt hai

marne se sakht qabr ki wahshat ka waqt hai

mayyat pe baad-e-dafn ye afat ka waqt hai

is waqt warison ki mohabbat ka waqt hai

hamdam nahin rafiq nahin mehrban nahin

ye wo jagah hai koi kisi ka jahan nahin

wo ajnabi makan wo andhera idhar idhar

pahle pahal wo basti se wirane ka safar

ne shama raushni ke liye ne shigaf-e-dar

ham saya wo ke dusre se ek be khabar

kis ko koi pukare kahan jae kya kare

asan sab pe qabr ki mushkil khuda kare

aksar tumhari shan mein farmate the pidar

turbat main apne shion ki lete hain ye khabar

ummid war mein bhi hun ya shah-e-bahr-o-bar

quran parhiyo qabr ke pahlu mein baith kar

murde lahad mein be kis-o-be yar hote hain

zindon se uns ke ye talab gar hote hain

ai nida rasul ki beti mein aunga

hote hi dafn tujh ko gale se lagaunga

aghosh mein liye hue jannat mein jaunga

faqa ke badle mewa-e-tuba khilaunga

mahbuba-e-khuda-o-nabi tera nam hai

madfan tire muhibon ka daralssalam hai

nagah mehr ne kiya duniya se intiqal

masjid mein murtaza gae mahzon-o-khasta hal

hujre mein bap ke gai khatun khush khisal

asma se boli mazhar-e-asma-e-zualjalal

kafur khuld fatima zahra ke pas la

pani hamare ghusl ko la aur libas-e-la

hujre mein ghusl kar ke parhi akhiri namaz

sajde mein sarjhuka ke kahe apne dil ke raz

awaz arji se kiya haq ne sarfaraz

zahra ne apne paon kiye qibla ko daraz

huron ne phir bahisht mein barpa ye ghul kiya

pito qaza ne shama payambar ko gul kiya

yan sab khare the hujre ke nazdik be qarar

kalima ke baad jab na sada ai zinhar

hujre mein pitte hue daure sab ek bar

chillai um sallama luti mein jigar figar

apna bhi sogwar randape mein kar gain

jiti rahi mein ap jahan se guzar gain

phir to har ek kucha mein mahshar bapa hua

apne parae daure ke hai hai ye kya hua

fizza pukari sida ka waqa hua

hujra batul pak ka matam sara hua

sine mein dam qalaq se ruka sans ulat gai

munh rakhe munh pe murde ke zinib lipat gai

le kar balaen kahti thi beti nisar ho

aman mein haul khati hun tum hoshyar ho

bhayya zamin pe lautte hain hamkanar ho

tum ankh khol do to sabhon ko qarar ho

hai hai ye chupke rahne ki kya bat ho gai

nana ka fatiha na diya rat ho gai

uthiye charagh-e-qabr nabi par jalaiye

suni pari hai nana ki saf jald jaiye

pahlu ka dard kaisa hai ye to bataiye

dekhon mein nabz hath to apna barhaiye

kyun ap kholti nahin chashm par ab ko

kya ghash mein dekhti hain risalat mab ko

hamsaiyan hain ap ki balin pe be qarar

aur painti zanan quraishi ki hai qatar

hai pahluon mein ap ka kumba sab ashkbar

sab puchhte hain ap ko zinib se bar bar

bi bi kaho kahan ka pata dun kidhar gain

ye to nahin zaban se nikalta ke margain

main dudh bakhshwa bhi na pai ke chal basen

sharbat bana ke lane na pai ke chal basen

sajjade se uthane na pai ke chal basen

main be nasib ane na pai ke chal basen

kya janti thi waqt ye hai intiqal ka

bais siwa hai ye mire ranj-o-malal ka

ai meri faqa kash miri nadar walida

ai meri be dawa miri bimar walida

kumba ki abru miri sardar walida

ai meri sabra miri nachar walida

nana ki sogwar ko taza khitab do

aman jawab-e-do miri aman jawab-e-do

hamsae uzr ke liye dewrhi pe hain baham

kahte hain ap roen muzahim na honge ham

khatir ho un ki jama nadamat ho un ki kam

munh dhanp kar jo bain karen ap ek dam

itna to un se kahiye ke ehsan kijiyo

zinib jo mujh ko roe use rone dijiyo

nagah ae rote hue shah ausiya

ghusl-o-hanut fatima khud hujre mein kiya

istabraq-e-bahisht-e-barin ka kafan diya

mayyat ke nur se hua tabut par ziya

bu-e-kafan mein khol ke rukhsar fatima

mushtaqo ao dekh lo didar fatima

phirne lagen kanizen janaze ke as pas

jhuk kar balaen betiyon ne len ba hal-e-yas

ab kya kahun ke shiddat-e-gham se hai dil udas

nazdik hai wo waqt ke sab huin be hawas

ghar mein ali lahad mein nabi thartharate hain

ban man ke bete man ke janaze par ate hain

nanhe se kurton ke hain gareban chak chak

gesu khule hain dale hue hain saron pe khak

nazdik hai ke walida ke gham mein hun halak

jari zaban par yahi nauha hai dard nak

jati ho tum nabi ki ziyarat ke waste

aman ghulam ae hain rukhsat ke waste

nana jo puchhen khadimon ki khair-o-afiyat

kahna zamana khun ka pyasa hai be jihat

baba ke qatl ki hai namazon mein mashwarat

nana hamare dil ko ho ab kis ki taqwiyat

shafqat ka hath ap ne sar se utha liya

ek walida thin pas unhen bhi bala liya

hone lage wida ye kah kar wo nek nam

nanhe se sar jhuka ke kiya akhiri salam

phir to wo mayyat jigar sedalanam

tharrai yun ke band kafan khul gae tamam

ashiq ko be mile hue kis tarah kal pare

zahra ke donon hath kafan se nikal pare

bahen gale mein pyar se beton ke dal den

aur sina se lipat gae jhuk kar wo naznin

hataf ne di ali ko nida ai amir den

rote hain har falak pe malak hilti hai zamin

taskin-e-arsh-e-aazam rab hada karo

beton ko man ki lash se jaldi juda karo

munh chum kar yatyimon ka bole ye martaza

pyaro farishte rote hain ab man se ho juda

fizza pukari bi bi ke ejaz par fida

bas ashiq-e-hasin-o-husn pyar ho chuka

bahen nikalo dafn mein ab der hoti hai

ai nida ke ruh nahin sair hoti hai

ab nazr de ye marsiya aur arz kar dabir

ya sida tumhen qasam khaliq-e-qadir

bahr-e-rasul-e-pak-o-piye hazrat-e-amir

tum par fida thi walida-e-zakir-e-haqir

farmaiye ye lutf ke wo rastgar ho

hulla kafan ho rauza-e-rizwan mazar ho