ملے گی شیخ کو جنت، ہمیں دوزخ عطا ہوگا

ملے گی شیخ کو جنت، ہمیں دوزخ عطا ہوگا

بس اتنی بات ہے جس کے لیے محشر بپا ہوگا

رہے دو دو فرشتے ساتھ اب انصاف کیا ہوگا

کسی نے کچھ لکھا ہوگا کسی نے کچھ لکھا ہوگا

بروز حشر حاکم قادر مطلق خدا ہوگا

فرشتوں کے لکھے اور شیخ کی باتوں سے کیا ہوگا

تری دنیا میں صبر و شکر سے ہم نے بسر کر لی

تری دنیا سے بڑھ کر بھی ترے دوزخ میں کیا ہوگا

سکون مستقل دل بے تمنا شیخ کی صحبت

یہ جنت ہے تو اس جنت سے دوزخ کیا برا ہوگا

مرے اشعار پر خاموش ہے جز بز نہیں ہوتا

یہ واعظ واعظوں میں کچھ حقیقت آشنا ہوگا

بھروسہ کس قدر ہے تجھ کو اخترؔ اس کی رحمت پر

اگر وہ شیخ صاحب کا خدا نکلا تو کیا ہوگا

milegi shaikh ko jannat, hamen dozakh ata hoga

bas itni bat hai jis ke liye mahshar bapa hoga

rahe do do farishte sath ab insaf kya hoga

kisi ne kuchh likha hoga kisi ne kuchh likha hoga

buruz-e-hashr hakim qadir-e-mutlaq khuda hoga

farishton ke likhe aur shaikh ki baton se kya hoga

tiri duniya mein sabr-o-shukr se ham ne basar kar li

tiri duniya se barh kar bhi tire dozakh mein kya hoga

sukun-e-mustaqil dil be tamanna shaikh ki sohbat

ye jannat hai to is jannat se dozakh kya bura hoga

mire ashar par khamosh hai juz buz nahin hota

ye waiz waizon mein kuchh haqiqat ashna hoga

bharosa kis qadar hai tujh ko akhtar us ki rahmat par

agar wo shaikh sahab ka khuda nikla to kya hoga