مر کے بھی قامت محبوب کی الفت نہ گئی

مر کے بھی قامت محبوب کی الفت نہ گئی

ہو چکا حشر بھی لیکن یہ قیامت نہ گئی

شب کو مے خوب سی پی صبح کو توبہ کر لی

رند کے رند رہے ہاتھ سے جنت نہ گئی

بوسہ لے کر جو مکرتا ہوں تو وہ کہتے ہیں

شاعری کا اثر اور جھوٹ کی عادت نہ گئی

داغ مٹتے نہ سنا دل سے تری حسرت کا

آئی جس گھر میں پھر اوس گھر سے یہ دولت نہ گئی

پاس بیٹھے بھی تو کیا جلد اٹھے گھبرا کر

میرا سودا تو گیا آپ کی وحشت نہ گئی

نہ ہوا صاف دل یار کسی طرح جلالؔ

خاک میں مل گئے ہم اس کی کدورت نہ گئی

mar ke bhi qamat mahbub ki ulfat na gai

ho chuka hashr bhi lekin ye qayamat na gai

shab ko mai khub si pi subh ko tauba kar li

rind ke rind rahe hath se jannat na gai

bosa le kar jo mukarta hun to wo kahte hain

shayari ka asar aur jhut ki adat na gai

dagh mitte na suna dil se tiri hasrat ka

ai jis ghar mein phir os ghar se ye daulat na gai

pas baithe bhi to kya jald uthe ghabra kar

mera sauda to gaya ap ki wahshat na gai

na hua saf dil-e-yar kisi tarah jalal

khak mein mil gae ham us ki kudurat na gai