مدت کے بعد منہ سے لگی ہے جو چھوٹ کر

مدت کے بعد منہ سے لگی ہے جو چھوٹ کر

تو یہ بھی مے پہ گرتی ہے کیا ٹوٹ ٹوٹ کر

مہندی تھا میرا خون کہ ہوتا جو رائیگاں

اک شب کے بعد ہاتھ سے قاتل کے چھوٹ کر

پہلا ہی دن تھا ہم کو کیے ترک مے کشی

کیا کیا پڑا ہے رات کو مینہ ٹوٹ ٹوٹ کر

صبر و قرار لے کے دیا داغ آرزو

آباد تم نے دل کو کیا مجھ کو لوٹ کر

حیرت ہے میرے اختر بخت سیاہ کو

کیوں کر گہن سے چاند نکلتا ہے چھوٹ کر

اللہ رے آنسوؤں کا کھٹکنا فراق میں

آنکھوں میں بھر گیا کوئی الماس کوٹ کر

ٹپکے نہیں قلم کے فقط اشک نامہ پر

وہ کچھ لکھا کہ روئی سیاہی بھی پھوٹ کر

کر بند و بست ابھی سے نہ گلشن میں باغباں

وہ دن تو ہو کہ مرغ قفس آئیں چھوٹ کر

صد حیف سرگذشت جو اپنی کہی جلالؔ

تو اس کو داستان سمجھ سچ کو جھوٹ کر

muddat ke baad munh se lagi hai jo chhut kar

to ye bhi mai pe girti hai kya tut tut kar

mehndi tha mera khun ke hota jo raigan

ik shab ke baad hath se qatil ke chhut kar

pahla hi din tha ham ko kiye tark-e-mai kashi

kya kya para hai rat ko menh tut tut kar

sabr-o-qarar le ke diya dagh-e-arzu

abad tum ne dil ko kiya mujh ko laut kar

hairat hai mere akhtar-e-bakht-e-siyah ko

kyun kar gahan se chand nikalta hai chhut kar

allah re ansuon ka khatakna firaq mein

ankhon mein bhar gaya koi almas kot kar

tapke nahin qalam ke faqat ashk nama par

wo kuchh likha ke roi siyahi bhi phut kar

kar band-o-bast abhi se na gulshan mein baghban

wo din to ho ke murgh-e-qafas aen chhut kar

sad haif sargazshat jo apni kahi jalal

to us ko dastan samajh sach ko jhut kar