مر رہتے جو گل بن تو سارا یہ خلل جاتا

مر رہتے جو گل بن تو سارا یہ خلل جاتا

نکلا ہی نہ جی ورنہ کانٹا سا نکل جاتا

پیدا ہے کہ پنہاں تھی آتش نفسی میری

میں ضبط نہ کرتا تو سب شہر یہ جل جاتا

میں گریۂ خونیں کو روکے ہی رہا ورنہ

اک دم میں زمانے کا یاں رنگ بدل جاتا

بن پوچھے کرم سے وہ جو بخش نہ دیتا تو

پرسش میں ہماری ہی دن حشر کا ڈھل جاتا

استادہ جہاں میں تھا میدان محبت میں

واں رستم اگر آتا تو دیکھ کے ٹل جاتا

وہ سیر کا وادی کے مائل نہ ہوا ورنہ

آنکھوں کو غزالوں کی پاؤں تلے مل جاتا

بے تاب و تواں یوں میں کاہے کو تلف ہوتا

یاقوتی ترے لب کی ملتی تو سنبھل جاتا

اس سیم بدن کو تھی کب تاب تعب اتنی

وہ چاندنی میں شب کی ہوتا تو پگھل جاتا

مارا گیا تب گزرا بوسے سے ترے لب کے

کیا میرؔ بھی لڑکا تھا باتوں میں بہل جاتا

mar rahte jo gul ban to sara ye khalal jata

nikla hi na ji warna kanta sa nikal jata

paida hai ke pinhan thi atish nafasi meri

main zabt na karta to sab shahr ye jal jata

main girya-e-khunin ko roke hi raha warna

ik dam mein zamane ka yan rang badal jata

bin puchhe karam se wo jo bakhsh na deta to

pursish mein hamari hi din hashr ka dhal jata

istada jahan mein tha maidan-e-mohabbat mein

wan rustam agar ata to dekh ke tal jata

wo sair ka wadi ke mail na hua warna

ankhon ko ghazalon ki paon tale mil jata

be tab-o-tawan yun main kahe ko talaf hota

yaquti tire lab ki milti to sambhal jata

is sim badan ko thi kab tab taab itni

wo chandni mein shab ki hota to pighal jata

mara gaya tab guzra bose se tire lab ke

kya mir bhi larka tha baton mein bahal jata