بستیاں کیسے نہ ممنون ہوں دیوانوں کی
مختار صدیقیبستیاں کیسے نہ ممنون ہوں دیوانوں کی
وسعتیں ان میں وہی لائے ہیں ویرانوں کی
کل گنے جائیں گے زمرے میں ستم رانوں کے
خیر مانگیں گے اگر آج ستم رانوں کی
خواب باطل بھی تو ہوتے ہیں تن آسانوں کے
سعیٔ مشکور بھی ہوتی ہے گراں جانوں کی
زخم شاکی ہیں ازل سے نمک افشانوں کے
بات رکھی گئی ہر دور میں پیکانوں کی
وہ بنا ساز بھی ہوتے ہیں گلستانوں کے
خاک جو چھانتے پھرتے ہیں بیابانوں کی
ٹکڑے جو گنتے ہیں ٹوٹے ہوئے پیمانوں کے
جان بن جاتے ہیں آخر وہی مے خانوں کی
تیور آتے ہیں حقیقت میں بھی افسانوں کے
کچھ حقیقت بھی ہوا کرتی ہے افسانوں کی
ہو بھی جاتے ہیں رفو چاک گریبانوں کے
تنگ بھی ہوتی ہے پہنائیاں دامانوں کی
عبرت آباد بھی دل ہوتے ہیں انسانوں کے
داد ملتی بھی نہیں خوں شدہ ارمانوں کی
ذرے زندان ملامت بھی ہیں ویرانوں کے
در بنا کرتی ہیں دیواریں ہی زندانوں کی
bastiyan kaise na mamnun hun diwanon ki
wusaten un mein wahi lae hain wiranon ki
kal gine jaenge zumre mein sitam ranon ke
khair mangenge agar aj sitam ranon ki
khwab batil bhi to hote hain tan asanon ke
sai-e-mashkur bhi hoti hai giran janon ki
zakhm shaki hain azal se namak ifshanon ke
bat rakhi gai har daur mein paikanon ki
wo bana saz bhi hote hain gulistanon ke
khak jo chhante phirte hain bayabanon ki
tukre jo ginte hain tute hue paimanon ke
jan ban jate hain akhir wahi mai khanon ki
tewar ate hain haqiqat mein bhi afsanon ke
kuchh haqiqat bhi hua karti hai afsanon ki
ho bhi jate hain rafu chak garebanon ke
tang bhi hoti hai pahnaiyan daminon ki
ibrat abad bhi dil hote hain insanon ke
dad milti bhi nahin khun shuda armanon ki
zarre zindan-e-malamat bhi hain wiranon ke
dar bana karti hain diwaren hi zindanon ki