مر گئے ہیں جو ہجرِ یار میں ہم

مر گئے ہیں جو ہجرِ یار میں ہم

سخت بے تاب ہیں مزار میں ہم

تا دلِ کینہ ور میں پائیں جگہ

خاک ہو کر ملے غبار میں ہم

وہ تو سو بار اختیار میں آئے

پر نہیں اپنے اختیار میں ہم

کب ہوئے خارِ راہِ غیر بھلا

کیوں کھٹکتے ہیں چشمِ یار میں ہم

کوئے دشمن میں ہو گئے پامال

آمد و رفتِ بار بار میں ہم

نعش پر تو خدا کے واسطے آ

مر گئے تیرے انتظار میں ہم

گر نہیں شیفتہ خیالِ فراق

کیوں تڑپتے ہیں وصلِ یار میں ہم

mar gae hain jo hijr-e-yar mein ham

sakht be tab hain mazar mein ham

ta dil-e-kina war mein paen jagah

khak ho kar mile ghubar mein ham

wo to sau bar ikhtiyar mein ae

par nahin apne ikhtiyar mein ham

kab hue khar-e-rah-e-ghair bhala

kyun khatakte hain chashm-e-yar mein ham

ku-e-dushman mein ho gae pamal

amad-o-raft-e-bar bar mein ham

naash par to khuda ke waste a

mar gae tere intizar mein ham

gar nahin shefta khayal-e-firaq

kyun tarapte hain wasl-e-yar mein ham