بزم عالم میں بہت سے ہم نے مارے ہاتھ پاؤں

بزم عالم میں بہت سے ہم نے مارے ہاتھ پاؤں

تیری صورت کے نہ دیکھے پیارے پیارے ہاتھ پاؤں

بحر الفت میں بہت سے ہم نے مارے ہاتھ پاؤں

لگ رہے مانند خس آخر کنارے ہاتھ پاؤں

عاشق موئے کمر کی لے خبر او بے خبر

سوکھ کر تنکا ہوئے ہیں اس کے سارے ہاتھ پاؤں

میری خدمت سے نہایت خوش ہوا وہ بد مزاج

وصل کی شب کام آئے اپنے بارے ہاتھ پاؤں

بحر ہستی میں ملا ہم کو در مقصد نہ حیف

موج کے مانند کیا کیا ہم نے مارے ہاتھ پاؤں

وقت ذبح بولا یہ قاتل عاشق ناد شاد سے

ٹکڑے کر ڈالا کبھی تو نے جو مارے ہاتھ پاؤں

کھیل رہتا ہے توکل پر مری اوقات کا

چلتے پھرتے ہیں ہمارے بے سہارے ہاتھ پاؤں

تیکھی تیکھی ان کی چتون بانکی بانکی ان کی چال

بھولی بھولی ان کی صورت پیارے پیارے ہاتھ پاؤں

bazm-e-alam mein bahut se ham ne mare hath paon

teri surat ke na dekhe pyare pyare hath paon

bahr-e-ulfat mein bahut se ham ne mare hath paon

lag rahe manind-e-khas akhir kinare hath paon

ashiq mu-e-kamar ki le khabar o be khabar

sukh kar tinka hue hain us ke sare hath paon

meri khidmat se nihayat khush hua wo bad mizaj

wasl ki shab kam ae apne bare hath paon

bahr-e-hasti mein mila ham ko dar maqsad na haif

mauj ke manind kya kya ham ne mare hath paon

waqt-e-zabh bola ye qatil ashiq nad shad se

tukre kar dala kabhi tu ne jo mare hath paon

khel rahta hai tawakkul par miri auqat ka

chalte phirte hain hamare be sahare hath paon

tikhi tikhi un ki chitwan banki banki un ki chal

bhuli bhuli un ki surat pyare pyare hath paon