مجھے یاد ہیں وہ دن جو تری بزم میں گزارے
ہوش بلگرامیمجھے یاد ہیں وہ دن جو تری بزم میں گزارے
وہ جھکی جھکی نگاہیں وہ دبے دبے اشارے
یہ ترا سکوت رنگیں یہ ادائے بے نیازی
کہیں بجھ کے رہ نہ جائیں مری روح کے شرارے
کبھی شوق زندگی تھا کبھی لطف سر خوشی تھا
مگر اب تو جی رہا ہوں تری یاد کے سہارے
یہ چمن چمن بہاریں یہ رواں دواں ہوائیں
انہیں کیا سمجھ سکیں گے غم زندگی کے مارے
مجھے کیا سکون ملتا مرے اشک کیسے تھمتے
کہ مچل رہے ہیں دل میں ترے غم کے تیز دھارے
کہیں ہے وجود ساحل مجھے کیسے باور آئے
مری کشتی تمنا نہ لگی کبھی کنارے
شب انتظار گزری مری زندگی نہ بدلی
وہی ہوشؔ میرے آنسو وہی ڈوبتے ستارے
mujhe yad hain wo din jo tiri bazm mein guzare
wo jhuki jhuki nigahen wo dabe dabe ishare
ye tira sukut-e-rangin ye adae be niyazi
kahin bujh ke rah na jaen miri ruh ke sharare
kabhi shauq-e-zindagi tha kabhi lutf sar khushi tha
magar ab to ji raha hun tiri yad ke sahare
ye chaman chaman baharen ye rawan dawan hawaen
unhen kya samajh sakenge gham-e-zindagi ke mare
mujhe kya sukun milta mire ashk kaise thamte
ke machal rahe hain dil mein tire gham ke tez dhare
kahin hai wajud-e-sahil mujhe kaise bawar ae
miri kashti-e-tamanna na lagi kabhi kinare
shab-e-intizar guzri miri zindagi na badli
wahi hosh mere ansu wahi dubte sitare