محبت باعث نا مہربانی ہوتی جاتی ہے

محبت باعث نا مہربانی ہوتی جاتی ہے

ہماری ساری محنت دھول دھانی ہوتی جاتی ہے

حکایت ہوں جو راتوں کو ہمیشہ ہوتی رہتی ہے

شکایت ہوں جو آپس میں زبانی ہوتی جاتی ہے

ترا غم آج تک تازہ ہے ظالم ورنہ دنیا میں

نئی شے دن گزرنے سے پرانی ہوتی جاتی ہے

تمہاری یاد میں اہل جہاں مر مر کے جیتے ہیں

قضا لوگوں کے حق میں زندگانی ہوتی جاتی ہے

بڑا الزام ٹھہرا ہے تعلق رشتہ داری کا

قرابت کی محبت بد گمانی ہوتی جاتی ہے

یہی تنبیہ ملنے پر انہیں مجبور کرتی ہے

یہی تاکید گویا ضد کی بانی ہوتی جاتی ہے

مرے غم میں وہ مجبوری سے ان حالوں کو پہنچے ہیں

کہ اب ان کی نزاکت ناتوانی ہوتی جاتی ہے

ترے کوچے میں اب گردش کی صورت پڑتی جاتی ہے

زمیں کی چال دور آسمانی ہوتی جاتی ہے

مرے پہلو میں دل کب تھا لہو کی بوند تھی مضطرؔ

سو اب وہ بوند بھی قسمت سے پانی ہوتی جاتی ہے

mohabbat bais-e-na mehrbani hoti jati hai

hamari sari mehnat dhul dhani hoti jati hai

hikayat hun jo raton ko hamesha hoti rahti hai

shikayat hun jo apas mein zabani hoti jati hai

tira gham aj tak taza hai zalim warna duniya mein

nai shai din guzarne se purani hoti jati hai

tumhari yad mein ahl-e-jahan mar mar ke jite hain

qaza logon ke haq mein zindagani hoti jati hai

bara ilzam thahra hai taalluq rishta dari ka

qarabat ki mohabbat bad gumani hoti jati hai

yahi tambih milne par unhen majbur karti hai

yahi takid goya zid ki bani hoti jati hai

mire gham mein wo majburi se in halon ko pahunche hain

ke ab un ki nazakat natawani hoti jati hai

tire kuche mein ab gardish ki surat parti jati hai

zamin ki chal daur-e-asmani hoti jati hai

mire pahlu mein dil kab tha lahu ki bund thi muztar

so ab wo bund bhi qismat se pani hoti jati hai