مجھے شکوہ نہیں برباد رکھ برباد رہنے دے
Bedam Warsi (1876–1936)مجھے شکوہ نہیں برباد رکھ برباد رہنے دے
مگر اللہ میرے دل میں اپنی یاد رہنے دے
قفس میں قید رکھ یا قید سے آزاد رہنے دے
بہر صورت چمن ہی میں مجھے صیاد رہنے دے
مرے ناشاد رہنے سے اگر تجھ کو مسرت ہے
تو میں ناشاد ہی اچھا مجھے ناشاد رہنے دے
تری شان تغافل پر مری بربادیاں صدقے
جو برباد تمنا ہو اسے برباد رہنے دے
تجھے جتنے ستم آتے ہیں مجھ پر ختم کر دینا
نہ کوئی ظلم رہ جائے نہ اب بیداد رہنے دے
نہ صحرا میں بہلتا ہے نہ کوئے یار میں ٹھہرے
کہیں تو چین سے مجھ کو دل ناشاد رہنے دے
کچھ اپنی گزری ہی بیدمؔ بھلی معلوم ہوتی ہے
مری بیتی سنا دے قصۂ فرہاد رہنے دے
mujhe shikwa nahin barbad rakh barbad rahne de
magar allah mere dil main apni yad rahne de
qafas mein qaid rakh ya qaid se azad rahne de
bahar surat chaman hi mein mujhe sayyad rahne de
mire nashad rahne se agar tujh ko masarrat hai
to main nashad hi achchha mujhe nashad rahne de
tiri shan-e-taghaful par miri barbadiyan sadqe
jo barbad-e-tamanna ho use barbad rahne de
tujhe jitne sitam ate hain mujh par khatm kar dena
na koi zulm rah jae na ab bedad rahne de
na sahra mein bahalta hai na ku-e-yar mein thahre
kahin to chain se mujh ko dil-e-nashad rahne de
kuchh apni guzri hi bedam bhali maalum hoti hai
miri biti suna de qissa-e-farhad rahne de