محفل سے اٹھانے کے سزا وار ہمیں تھے

محفل سے اٹھانے کے سزا وار ہمیں تھے

سب پھول ترے باغ تھے اک خار ہمیں تھے

ہم کس کو دکھاتے شب فرقت کی اداسی

سب خواب میں تھے رات کو بیدار ہمیں تھے

سودا تری زلفوں کا گیا ساتھ ہمارے

مر کر بھی نہ چھوٹے وہ گرفتار ہمیں تھے

کل رات کو دیکھا تھا جسے خواب میں تم نے

رخسار پہ رکھے ہوئے رخسار ہمیں تھے

دل سوختہ تھے چاہنے والوں میں تمہارے

لیکن سبب گرمئ بازار ہمیں تھے

کل کوچۂ قاتل میں جو تھا خلق کا مجمع

کھائے ہوئے اس ہاتھ کی تلوار ہمیں تھے

اے عشق مژہ کون ہمیں دیکھنے آتا

آنکھوں میں کھٹکتے تھے وہ بیمار ہمیں تھے

تربت میں بھی آنکھیں نہ ہوئیں بند ہماری

ایسے ترے اک طالب دیدار ہمیں تھے

ٹھنڈے کئے غیروں کے دل اور ہم کو جلایا

اک تھے تو محبت کے گنہ گار ہمیں تھے

ملتے ہی لب یار سے لب دل نکل آیا

مارا جسے عیسیٰ نے وہ بیمار ہمیں تھے

تم غیروں سے ڈر ڈر کے لپٹ جاتے تھے پیہم

کل رات کو نالاں پس دیوار ہمیں تھے

سب راز تعشقؔ سے بیاں ہوتے تھے دل کے

پہلے ترے اک محرم اسرار ہمیں تھے

mahfil se uthane ke saza war hamen the

sab phul tire bagh the ik khar hamen the

ham kis ko dikhate shab-e-furqat ki udasi

sab khwab mein the rat ko bedar hamen the

sauda tiri zulfon ka gaya sath hamare

mar kar bhi na chhote wo giraftar hamen the

kal rat ko dekha tha jise khwab mein tum ne

rukhsar pe rakhe hue rukhsar hamen the

dil sokhta the chahne walon mein tumhare

lekin sabab-e-garmi-e-bazar hamen the

kal kucha-e-qatil mein jo tha khalq ka majmaa

khae hue is hath ki talwar hamen the

ai ishq mizha kaun hamen dekhne ata

ankhon mein khatakte the wo bimar hamen the

turbat mein bhi ankhen na huin band hamari

aise tire ik talib-e-didar hamen the

thande kiye ghairon ke dil aur ham ko jalaya

ik the to mohabbat ke gunah gar hamen the

milte hi lab-e-yar se lab dil nikal aya

mara jise isa ne wo bimar hamen the

tum ghairon se dar dar ke lipat jate the paiham

kal rat ko nalan pas-e-diwar hamen the

sab raz taashshuq se bayan hote the dil ke

pahle tire ik mahram-e-asrar hamen the