محبوب خدا نے تجھے نایاب بنایا

محبوب خدا نے تجھے نایاب بنایا

قد سرو کیا رخ گل مہتاب بنایا

جب کچھ نہ بنی عشق نے بیتاب بنایا

خود بن گیا شعلہ مجھے سیماب بنایا

اس حسن کے دریا نے جو پھر کر مجھے دیکھا

موج قدم ناز کو گرداب بنایا

سرمست شہادت ہیں ترے عشق میں ساقی

آب دم خنجر کو مئے ناب بنایا

آگاہ کیا عشق نے قانون وفا سے

جب ناخن شمشیر کو مضراب بنایا

سب عضو بدن شمع صفت بہہ گئے گل کر

اس سوزش دل نے مجھے سیلاب بنایا

اک رات اڑائی نہ مری دختر رز سے

ساقی نے بط مے کو بھی سرخاب بنایا

جسم ایسا دمکتا ہے کہ کپڑے چمک اٹھے

نینو کو ترے حسن نے کمخواب بنایا

کب طالب راحت ہوئے زخمیٔ محبت

مرہم کی جو حاجت ہوئی تیزاب بنایا

عارض نے کیا سر بہ زمیں سارے گلوں کو

قامت نے ہر اک شاخ کو محراب بنیا

اے بحرؔ بر و بحر میں گردش رہے ہم کو

قسمت نے بگولا تجھے گرداب بنایا

mahbub-e-khuda ne tujhe nayab banaya

qad sarw kiya rukh-e-gul-e-mahtab banaya

jab kuchh na bani ishq ne betab banaya

khud ban gaya shola mujhe simab banaya

us husn ke dariya ne jo phir kar mujhe dekha

mauj-e-qadam naz ko girdab banaya

sarmast-e-shahadat hain tire ishq mein saqi

ab-e-dam khanjar ko mai-e-nab banaya

agah kiya ishq ne qanun-e-wafa se

jab nakhun-e-shamshir ko mizrab banaya

sab uzw-e-badan shama sifat bah gae gul kar

is sozish-e-dil ne mujhe sailab banaya

ik rat urai na miri dukhtar-e-raz se

saqi ne bat-e-mai ko bhi surkhab banaya

jism aisa damakta hai ke kapre chamak uthe

naino ko tire husn ne kamkhwab banaya

kab talib rahat hue zakhmi-e-mohabbat

marham ki jo hajat hui tezab banaya

ariz ne kiya sar ba zamin sare gulon ko

qamat ne har ik shakh ko mehrab-e-baniya

ai bahr bar-o-bahr mein gardish rahe ham ko

qismat ne bagula tujhe girdab banaya