محبت کیا بڑھی ہے وہم باہم بڑھتے جاتے ہیں

محبت کیا بڑھی ہے وہم باہم بڑھتے جاتے ہیں

ہم ان کو آزماتے ہیں وہ ہم کو آزماتے ہیں

نہ گھٹتی شان معشوقی جو آ جاتے عیادت کو

برے وقتوں میں اچھے لوگ اکثر کام آتے ہیں

جو ہم کہتے نہیں منہ سے تو یہ اپنی مروت ہے

چرانا دل کا ظاہر ہے کہ وہ آنکھیں چراتے ہیں

سماں اس بزم کا برسوں ہی گزرا ہے نگاہوں سے

کب ایسے ویسے جلسے اپنی آنکھوں میں سماتے ہیں

کہاں تک امتحاں کب تک محبت آزماؤ گے

انہیں باتوں سے دل اہل وفا کے چھوٹ جاتے ہیں

خمار آنکھوں میں باقی ہے ابھی تک بزم دشمن کا

تصدق اس ڈھٹائی کے نظر ہم سے ملاتے ہیں

دل اک جنس گراں مایہ ہے لیکن آنکھ والوں میں

یہ دیکھیں حسن والے اس کی قیمت کیا لگاتے ہیں

کسی کے سر کی آفت ہو ہمارے سر ہی آتی ہے

کسی کا دل کوئی تاکے مگر ہم چوٹ کھاتے ہیں

گئے وہ دن کہ نامے چاک ہوتے تھے حفیظؔ اپنے

حسین اب تو مری تحریر آنکھوں سے لگاتے ہیں

mohabbat kya barhi hai wahm baham barhte jate hain

ham un ko azmate hain wo ham ko azmate hain

na ghatti shan-e-maashuqi jo a jate ayadat ko

bure waqton mein achchhe log aksar kam ate hain

jo ham kahte nahin munh se to ye apni murawwat hai

churana dil ka zahir hai ke wo ankhen churate hain

saman is bazm ka barson hi guzra hai nigahon se

kab aise waise jalse apni ankhon mein samite hain

kahan tak imtihan kab tak mohabbat azmaoge

unhen baton se dil ahl-e-wafa ke chhut jate hain

khumar ankhon mein baqi hai abhi tak bazm-e-dushman ka

tasadduq is dhitai ke nazar ham se milate hain

dil ik jins-e-giran maya hai lekin ankh walon mein

ye dekhen husn wale us ki qimat kya lagate hain

kisi ke sar ki afat ho hamare sar hi ati hai

kisi ka dil koi take magar ham chot khate hain

gae wo din ke name chak hote the hafiz apne

hasin ab to miri tahrir ankhon se lagate hain