بس خاک قدم دیجئے تکرار بہت کی

بس خاک قدم دیجئے تکرار بہت کی

مٹی مری اس خاک نے ہی خوار بہت کی

چڑ مجھ کو تجھے ریجھ کے تکرار بہت کی

خوش رہ کہ خوشامد تری اے یار بہت کی

ہرگز نہ گئی پیش نہ آیا مہ بے مہر

ہر چند کہ زاری پس دیوار بہت کی

لائی کشش دل ہی تمہیں تم نے تو ورنہ

یہاں آنے میں اک عمر تلک عار بہت کی

اس چشم نے دیکھا دل بیمار کو میرے

بیمار نے کل خاطر بیمار بہت کی

ابرو کی تصور میں ہوا قتل مرا دل

پھل کیوں نہ ملے مرد تھا تلوار بہت کی

عشاق میں میں ہی ہدف تیر ہوں اس کا

عظمت ہی یہی خدمت سرکار بہت کی

اس طرح کا بے دید تو غم ہوگا جہاں میں

کی ہم نے بھی ہے دید طرحدار بہت کی

صورت تری آگے ہی بھبوکا تھی ولیکن

زلفوں کے بکھرنے نے دھواندھار بہت کی

یہاں آٹھ پہر جنس سے وفا ہم نے دکھائی

دیکھا نہ خریدار تو ناچار بہت کی

یا رب نہ رہے نام جدائی کہ رہ عشق

آسان تھی پر اس نے ہی دشوار بہت کی

معلوم کوئی دن کو تجھے ہوگی حقیقت

کم اس ترے اقرار کی انکار بہت کی

ہر چند کہ خط سے بھی دھواں شکل ہے اے مہ

پر خط کی نہ رکھنے نے نمودار بہت کی

گھر میں نہ ترے کود سکا رات گئے میں

ہاں اپنی سی تدبیر تو اے یار بہت کی

بہبود کے آثار نہ دیکھے کبھو ہرگز

جس شخص نے اونچی تری دیوار بہت کی

کم ہم سا خریدار بہم پہنچے گا اس کو

کیوں عشق نے جنس غم بسیار بہت کی

بولا سر منصور سر دار پہ احساںؔ

حق ہے کہ سزا وار تھے پندار بہت کی

bas khak qadam dijiye takrar bahut ki

mitti miri is khak ne hi khwar bahut ki

char mujh ko tujhe rijh ke takrar bahut ki

khush rah ke khushamad tiri ai yar bahut ki

hargiz na gai pesh na aya mah-e-be mehr

har chand ke zari pas-e-diwar bahut ki

lai kashish-e-dil hi tumhen tum ne to warna

yahan ane mein ik umr talak ar bahut ki

us chashm ne dekha dil-e-bimar ko mere

bimar ne kal khatir-e-bimar bahut ki

abru ki tasawwur mein hua qatl mira dil

phal kyun na mile mard tha talwar bahut ki

ushshaq mein main hi hadaf-e-tir hun us ka

azmat hi yahi khidmat-e-sarkar bahut ki

is tarah ka be did to gham hoga jahan mein

ki ham ne bhi hai did tarhdar bahut ki

surat tiri age hi bhabuka thi walekin

zulfon ke bikharne ne dhawandhar bahut ki

yahan ath pahar jins se wafa ham ne dikhai

dekha na kharidar to nachar bahut ki

ya rab na rahe nam judai ke rah-e-ishq

asan thi par us ne hi dushwar bahut ki

maalum koi din ko tujhe hogi haqiqat

kam is tire iqrar ki inkar bahut ki

har chand ke khat se bhi dhuan shakl hai ai mah

par khat ki na rakhne ne numudar bahut ki

ghar mein na tire kud saka rat gae mein

han apni si tadbir to ai yar bahut ki

behbud ke asar na dekhe kabhu hargiz

jis shakhs ne unchi tiri diwar bahut ki

kam ham sa kharidar baham pahunchega us ko

kyun ishq ne jins-e-gham bisyar bahut ki

bola sar mansur sar-e-dar pe ehsan

haq hai ke saza war the pindar bahut ki