محبت کا تری بندہ ہر اک کو اے صنم پایا

محبت کا تری بندہ ہر اک کو اے صنم پایا

برابر گردن شاہ و گدا دونوں کو خم پایا

برنگ شمع جس نے دل جلایا تیری دوری میں

تو اس نے منزل مقصود کو زیر قدم پایا

بجا کرتے ہیں عاشق طاق ابرو کی پرستاری

یہی محراب دیر و کعبہ میں بھی ہم نے خم پایا

نشانہ تیر تہمت کا ہے میرا اختر طالع

اٹھاؤں داغ میں تو آسماں سمجھے درم پایا

ہزاروں حسرتیں جاویں گی میرے ساتھ دنیا سے

شرار و برق سے بھی عرصۂ ہستی کو کم پایا

سوائے رنج کچھ حاصل نہیں ہے اس خرابے میں

غنیمت جان جو آرام تو نے کوئی دم پایا

نظر آیا تماشائے جہاں جب بند کیں آنکھیں

صفائے قلب سے پہلو میں ہم نے جام جم پایا

جلایا اور مارا حسن کی نیرنگ سازی نے

کبھی برق غضب اس کو کبھی ابر کرم پایا

فراق انجام کام آغاز وصلت کا بلا شک ہے

بہت رویا میں روح و تن کو جب مشتاق ہم پایا

ہر اک جوہر میں اس کا نقش پائے رفتگاں سمجھا

دم شمشیر قاتل جادۂ راہ عدم پایا

ہمارا کعبۂ مقصود تیرا طاق ابرو ہے

تری چشم سیہ کو ہم نے آہوئے حرم پایا

ہوا ہرگز نہ خط شوق کا ساماں درست آتشؔ

سیاہی ہو گئی نایاب اگر ہم نے قلم پایا

mohabbat ka tiri banda har ik ko ai sanam paya

barabar gardan-e-shah-o-gada donon ko kham paya

barang-e-shama jis ne dil jalaya teri duri mein

to us ne manzil-e-maqsud ko zer-e-qadam paya

baja karte hain ashiq taq-e-abru ki parastari

yahi mehrab-e-dair-o-kaaba mein bhi ham ne kham paya

nishana tir tohmat ka hai mera akhtar-e-tale

uthaun dagh mein to asman samjhe diram paya

hazaron hasraten jawengi mere sath duniya se

sharar-o-barq se bhi arsa-e-hasti ko kam paya

siwae ranj kuchh hasil nahin hai is kharabe mein

ghanimat jan jo aram tu ne koi dam paya

nazar aya tamashae jahan jab band-e-kin ankhen

safa-e-qalb se pahlu mein ham ne jam-e-jam paya

jalaya aur mara husn ki nairang sazi ne

kabhi barq-e-ghazab us ko kabhi abr-e-karam paya

firaq anjam kam aghaz-e-waslat ka bala shak hai

bahut roya mein ruh-o-tan ko jab mushtaq ham paya

har ik jauhar mein us ka naqsh-e-pae raftagan samjha

dam-e-shamshir-e-qatil jada-e-rah-e-adam paya

hamara kaaba-e-maqsud tera taq-e-abru hai

tiri chashm-e-siyah ko ham ne ahu-e-haram paya

hawa hargiz na khat-e-shauq ka saman durust atish

siyahi ho gai nayab agar ham ne qalam paya