Arooz is now on the App Store, for iPhone and iPad. Download →

All poetry

مجھ سے ملنے شب غم اور تو کون آئے گا

Shakeb Jalali (1934–1966)

مجھ سے ملنے شب غم اور تو کون آئے گا

میرا سایہ ہے جو دیوار پہ جم جائے گا

ٹھہرو ٹھہرو مرے اصنام خیالی ٹھہرو

میرا دل گوشۂ تنہائی میں گھبرائے گا

لوگ دیتے رہے کیا کیا نہ دلاسے مجھ کو

زخم گہرا ہی سہی زخم ہے بھر جائے گا

عزم پختہ ہی سہی ترک وفا کا لیکن

منتظر ہوں کوئی آ کر مجھے سمجھائے گا

آنکھ جھپکے نہ کہیں راہ اندھیری ہی سہی

آگے چل کر وہ کسی موڑ پہ مل جائے گا

دل سا انمول رتن کون خریدے گا شکیبؔ

جب بکے گا تو یہ بے دام ہی بک جائے گا