مجھ کو دل قسمت نے اس کو حسن غارت گر دیا

مجھ کو دل قسمت نے اس کو حسن غارت گر دیا

چور کر دے کیوں نہ وہ شیشہ جسے پتھر دیا

اس سے طالب ہوں دیت کا آپ سے مطلب نہیں

جس نے گردن ایک کو دی ایک کو خنجر دیا

تھا مکافات عمل احباب کا حسن عمل

یہ بھی ایسا قرض تھا جو اور سے لے کر دیا

اب نہ ہے فکر حفاظت اور نہ ضیق رفع کار

دینے والے نے دیا اور میری خواہش بھر دیا

گریۂ بے اختیار غم بھی تھا فطری علاج

جس نے تھوڑے جوش کو ہر مرتبہ کم کر دیا

جس میں کیف غم نہیں باز آئے ایسے دل سے ہم

یہ بھی دنیا ہے کوئی مے تو نہ دی ساغر دیا

آرزوؔ اک روز ڈھا دیتا مجھے میرا ہی زور

یہ بھی اس کی کارسازی دل میں جس نے ڈر دیا

mujh ko dil qismat ne us ko husn gharat gar diya

chur kar de kyun na wo shisha jise patthar diya

us se talib hun det ka ap se matlab nahin

jis ne gardan ek ko di ek ko khanjar diya

tha mukafat-e-amal ahbab ka husn-e-amal

ye bhi aisa qarz tha jo aur se le kar diya

ab na hai fikr-e-hifazat aur na ziq rafa kar

dene wale ne diya aur meri khwahish bhar diya

girya-e-be ikhtiyar-e-gham bhi tha fitri ilaj

jis ne thore josh ko har martaba kam kar diya

jis mein kaif-e-gham nahin baz ae aise dil se ham

ye bhi duniya hai koi mai to na di saghar diya

arzu ik roz dha deta mujhe mera hi zor

ye bhi us ki karsazi dil mein jis ne dar diya