Arooz is now on the App Store, for iPhone and iPad. Download →

All poetry

مجھ کو سمجھو یادگار رفتگان لکھنؤ

Nazm Tabatabai (1854–1933)

مجھ کو سمجھو یادگار رفتگان لکھنؤ

ہوں قد آدم غبار کاروان لکھنؤ

خون حسرت کہہ رہا ہے داستان لکھنؤ

رہ گیا ہے اب یہی رنگیں بیان لکھنؤ

گوش عبرت سے سنے کوئی مری فریاد ہے

بلبل خونیں نوائے بوستان لکھنؤ

میرے ہر آنسو میں اک آئینۂ تصویر ہے

میرے ہر نالہ میں ہے طرز فغان لکھنؤ

ڈھونڈھتا ہے اب کسے لے کر چراغ آفتاب

کیوں مٹایا اے فلک تو نے نشان لکھنؤ

لکھنؤ جن سے عبارت تھی ہوئے وہ ناپدید

ہے نشان لکھنؤ باقی نہ شان لکھنؤ

اب نظر آتا نہیں وہ مجمع اہل کمال

کھا گئے ان کو زمین و آسمان لکھنؤ

پہلے تھا اہل زباں کا دور اب گردش میں ہیں

چاہئے تھی تیغ اردو کو فسان لکھنؤ

مرثیہ گو کتنے یکتائے زمانہ تھے یہاں

کوئی تو اتنوں میں ہوتا نوحہ خوان لکھنؤ

یہ غبار ناتواں خاکستر پروانہ ہے

خاندان اپنا تھا شمع دودمان لکھنؤ

چلتا تھا جب گھٹنیوں اپنے یہاں طفل رضیع

سجدہ کرتے تھے اسے گردن کشان لکھنؤ

عہد پیرانہ سری میں کیوں نہ شیریں ہو سخن

بچپنے میں میں نے چوسی ہے زبان لکھنؤ

گلشن فردوس پر کیا ناز ہے رضواں تجھے

پوچھ اس کے دل سے جو ہے رتبہ دان لکھنؤ

بوئے انس آتی ہے حیدرؔ خاک مٹیا برج سے

جمع ہیں اک جا وطن آوارگان لکھنؤ