مجھ سے اک بات کیا کیجئے بس — غلام علی ہمدانی مصحفی (Mushafi Ghulam Hamdani)

مجھ سے اک بات کیا کیجئے بس

اس قدر مہر و وفا کیجئے بس

آفریں سامنے آنکھوں کے مری

یوں ہی تا دیر رہا کیجئے بس

دل بیمار ہوا اب چنگا

دوستو ترک دوا کیجئے بس

خون عاشق سے یہ پرہیز اسے

آشنائے کف پا کیجئے بس

شرم تا چند حیا بھی کب تک

منہ سے برقعے کو جدا کیجئے بس

گر زباں اپنی ہو گویا تو مدام

طالعوں کا ہی گلا کیجئے بس

تم میاں مصحفیؔ رخصت تو ہوئے

اب کھڑے کیوں ہو دعا کیجئے بس