مجھ کو اب ساقیٔ گلفام سے کچھ کام نہیں

مجھ کو اب ساقیٔ گلفام سے کچھ کام نہیں

مے سے کچھ کام نہیں جام سے کچھ کام نہیں

دل میں خوش آئی ہیں صحرا کی ببولیں پر خار

اب کسی سرو گل اندام سے کچھ کام نہیں

اپنے آرام سے ہوں دشت جنوں میں تنہا

کسی محبوب دل آرام سے کچھ کام نہیں

خانہ برباد ہوں صحرا میں بگولوں کی طرح

سقف و دیوار و در و بام سے کچھ کام نہیں

طائر روح رمیدہ کی طرح چھوٹا ہوں

اب تو صیاد ترے دام سے کچھ کام نہیں

طبع روشن کو نہیں خوف سیہ روزی کا

صبح محشر ہوں مجھے شام سے کچھ کام نہیں

اتنی مدت سے ہوں غربت میں وطن بھول گیا

مجھ کو اب نامہ و پیغام سے کچھ کام نہیں

ہے فراق بت خود کام میں ناسخؔ کا کلام

ہوں میں ناکام مجھے کام سے کچھ کام نہیں

mujh ko ab saqi-e-gulfam se kuchh kam nahin

mai se kuchh kam nahin jam se kuchh kam nahin

dil mein khush ai hain sahra ki babulen pur khar

ab kisi sarw-e-gul andam se kuchh kam nahin

apne aram se hun dasht-e-junun mein tanha

kisi mahbub dil aram se kuchh kam nahin

khana barbad hun sahra mein bagulon ki tarah

saqaf-o-diwar-o-dar-o-bam se kuchh kam nahin

tair-e-ruh ramida ki tarah chhota hun

ab to sayyad tire dam se kuchh kam nahin

tab-e-raushan ko nahin khauf-e-siyah rozi ka

subh-e-mahshar hun mujhe sham se kuchh kam nahin

itni muddat se hun ghurbat mein watan bhul gaya

mujh ko ab nama-o-paigham se kuchh kam nahin

hai firaq-e-but-e-khud kam mein nasikh ka kalam

hun main nakam mujhe kam se kuchh kam nahin