مجھ کو مرے نصیب نے روز ازل سے کیا دیا

مجھ کو مرے نصیب نے روز ازل سے کیا دیا

دولت دو جہاں نہ دی اک دل مبتلا دیا

دل ہی نگاہ ناز کا ایک ادا شناس تھا

جلوۂ برق طور نے طور کو کیوں جلا دیا

قبر میں جب کسی طرح دل کی تڑپ نہ کم ہوئی

یاد خرام ناز نے حشر کا آسرا دیا

روز جزا گلہ تو کیا شکر ستم ہی بن پڑا

ہائے کہ دل کے درد نے درد کو دل بنا دیا

اب مری لاش پر حضور موت کو کوستے تو ہیں

آپ کو یہ بھی ہوش ہے کس نے کسے مٹا دیا

دل میں سما کے پھر گئی آس بندھا کے پھر گئی

آج نگاہ دوست نے کعبہ بنا کے ڈھا دیا

اف کہ گناہ گار ہم ہیں تو مگر خطا معاف

آٹھ پہر کے درد نے دل ہی تو ہے دکھا دیا

آپ ہم اپنی آگ میں اے غم عشق جل بجھے

آگ لگے اس آگ کو پھونک دیا جلا دیا

یوں نہ کسی طرح کٹی جب مری زندگی کی رات

چھیڑ کے داستان غم دل نے مجھے سلا دیا

گریۂ آتشیں کی داد دے شب غم تو کون دے

خود سر شام کیا بجھی شمع نے دل بجھا دیا

یاس نے درد ہی نہیں حق تو یہ ہے دوا بھی دی

فانیؔ ناامید کو موت کا آسرا دیا

mujh ko mire nasib ne roz-e-azal se kya diya

daulat do jahan na di ik dil-e-mubtala diya

dil hi nigah-e-naz ka ek ada shanas tha

jalwa-e-barq-e-tur ne tur ko kyun jala diya

qabr mein jab kisi tarah dil ki tarap na kam hui

yad khiram-e-naz ne hashr ka asra diya

roz-e-jaza gila to kya shukr-e-sitam hi ban para

hae ke dil ke dard ne dard ko dil bana diya

ab miri lash par huzur maut ko koste to hain

ap ko ye bhi hosh hai kis ne kise mita diya

dil mein sama ke phir gai as bandha ke phir gai

aj nigah-e-dost ne kaaba bana ke dha diya

uf ke gunah gar ham hain to magar khata muaf

ath pahar ke dard ne dil hi to hai dikha diya

ap ham apni ag mein ai gham-e-ishq jal bujhe

ag lage is ag ko phunk diya jala diya

yun na kisi tarah kati jab miri zindagi ki rat

chher ke dastan-e-gham dil ne mujhe sula diya

girya-e-atishin ki dad de shab-e-gham tu kaun de

khud sar-e-sham kya bujhi shama ne dil bujha diya

yas ne dard hi nahin haq to ye hai dawa bhi di

fani naummid ko maut ka asra diya