لیس ہو کر جو مرا ترک جفا کار چلے

لیس ہو کر جو مرا ترک جفا کار چلے

سیکڑوں خون ہوں ہر گام پہ تلوار چلے

ناتوانی نے انہیں دریا پہ جانے نہ دیا

اٹھ کے سو بار گرے راہ میں سو بار چلے

تیرا کوچہ ہے وہ اے بت کہ ہزاروں زاہد

ڈال کے سبحہ میں یاں رشتۂ زنار چلے

اے شہ حسن مکدر نہ ہو گر تیرا مزاج

خاک اپنی بھی جلو میں پس رہوار چلے

سن کے یہ گرمئ بازار تیری اے یوسف

نقد جاں رکھ کے ہتھیلی پہ خریدار چلے

ہے یقیں حشر میں بھی ایک نیا محشر ہو

اٹھ کے گر کاکل جاناں کے گرفتار چلے

فصل گل آئی اٹھا ابر چلی سرد ہوا

سوئے مے خانہ اکڑتے ہوئے مے خوار چلے

ہوگا احساں پئے گلگشت اگر تو صیاد

ساتھ لے کر قفس مرغ گرفتار چلے

دیر سے بیٹھے تھے مشتاق سخن سب یہ حبیبؔ

دیکھ اٹھتے ہی تیرے بزم سے حضار چلے

les ho kar jo mira tark-e-jafa kar chale

saikron khun hun har gam pe talwar chale

natawani ne unhen dariya pe jane na diya

uth ke sau bar gire rah mein sau bar chale

tera kucha hai wo ai but ke hazaron zahid

dal ke subha mein yan rishta-e-zunnar chale

ai shah-e-husn mukaddar na ho gar tera mizaj

khak apni bhi jilau mein pas rahwar chale

sun ke ye garmi-e-bazar teri ai yusuf

naqd-e-jan rakh ke hatheli pe kharidar chale

hai yaqin hashr mein bhi ek naya mahshar ho

uth ke gar kakul janan ke giraftar chale

fasl-e-gul ai utha abr chali sard hua

su-e-mai khana akarte hue mai khwar chale

hoga ehsan piye gulgasht agar to sayyad

sath le kar qafas-e-murgh-e-giraftar chale

der se baithe the mushtaq-e-sukhan sab ye habib

dekh uthte hi tere bazm se hazar chale