مآل جور سمجھے اور نہ انجام وفا سمجھے

مآل جور سمجھے اور نہ انجام وفا سمجھے

نہ ان کا مدعا جانا نہ اپنا مدعا سمجھے

تم اس مدہوش کو کیوں شاکیٔ جور و وفا سمجھے

جو مصروف دعا رہ کر نہ مقصود دعا سمجھے

زمانہ میں ہزاروں صورتیں ہیں موت آنے کی

ہمیں کیوں کوئی اس کا کشتۂ تیغ ادا سمجھے

وفا کا تذکرہ بھی جرم ہے کیا کیوں بگڑتے ہو

ذرا سوچو تو کیا میں نے کہا اور آپ کیا سمجھے

اگر تو دشت غربت میں مرا ہو ہم سفر ناصح

تو رہزن تو کجا ریگ رواں کو رہنما سمجھے

جہاں میں بے نیازی کی اسے شانیں دکھانا ہیں

وہ کیوں پابند فطرت ہو وہ کیوں اچھا برا سمجھے

کسی کی شوخیٔ برق نظر کا ہے یہ آئینہ

منیرؔ اس اضطراب دل کو میرے کوئی کیا سمجھے

maal-e-jaur samjhe aur na anjam-e-wafa samjhe

na un ka muddaa jana na apna muddaa samjhe

tum is madhosh ko kyun shaki-e-jaur-o-wafa samjhe

jo masruf-e-dua rah kar na maqsud-e-dua samjhe

zamana mein hazaron suraten hain maut ane ki

hamen kyun koi us ka kushta-e-tegh-e-ada samjhe

wafa ka tazkira bhi jurm hai kya kyun bigarte ho

zara socho to kya main ne kaha aur ap kya samjhe

agar to dasht-e-ghurbat mein mira ho ham safar naseh

tu rahzan to kuja reg-e-rawan ko rahnuma samjhe

jahan mein be niyazi ki use shanen dikhana hain

wo kyun paband-e-fitrat ho wo kyun achchha bura samjhe

kisi ki shokhi-e-barq-e-nazar ka hai ye aina

munir is iztirab-e-dil ko mere koi kya samjhe